馮諾嘉手記：奄尖大少 破蛋有哩

魑魅魍魉

　　今屆世界盃已經踢咗好多場，早前德國大炒澳洲四比零，巴西對北韓贏二比一，烏拉圭贏南非三比○，除咗呢三場嘅入球比較多之外，其餘賽事都係開細，就算係強隊如阿根廷，都係贏一球起兩球止，諗住有啲弱旅會畀人大炒，如美國、北韓及瑞士等球隊，結果佢哋嘅死守戰略成功，要入佢哋波都唔係易事，競爭過程亦唔算激烈。

兩大騎師鬥法精采

　　反而喺馬場之上，周三賽日韋達對柏寶一戰更加精采，可能世界盃氣氛濃厚，就連講馬嘅人都好似上咗癮咁，當日講馬好似講波一樣，韋達同柏寶你追我逐，頭四場已經二比二平手，柏寶憑「確威星」再下一城後，韋達又以「川河勁駒」及「國寶」連追兩場，正當大家以為大局已定嘅時候，柏寶喺尾場騎「福勝滿載」贏多場，十一場賽事完結後，結果係四比四打成平手，比世界盃更刺激。

　　睇番騎師龍虎榜形勢，一輪你爭我奪之後，柏寶暫時仍以四場頭馬壓住韋達，由於柏寶早前表現比較反覆，練馬師葉楚航講明今季唔再用佢，間接增加咗柏寶嘅不利形勢，反觀韋達有蔡約翰支持，蔡廐馬演出普遍準繩，依家有埋葉楚航幫手，加上其他華籍倉口支持，隨時有機會後上反勝。不過，柏寶亦有方嘉柏力撐，排位一出，方廐十匹參戰馬中，只有兩匹畀湯智傑騎，其餘全部由柏寶操刀，方嘉柏一直係跑馬地賽事專家，今次谷草日馬，係佢同柏寶連場數胡嘅最佳時機。

　　今次初步睇好柏寶坐騎「再來風」同埋韋達嘅「奄尖大少」，前駒近仗連番跑近，前仗跑谷草1200米，被捧成2.4倍大熱，只係以短馬頭位輸畀「威威財星」，今場乘勇再戰，當然想補中作交代。「奄尖大少」（圖）最近亦連番喺谷中一哩入位，上場同程跑第三，已一再試準，今次再接再厲，抽到三檔唔錯，隨時可以取得零的突破。