高清睇跑馬：高飛飛夠本錢

魑魅魍魉

　　今季總場次679田草四班1000米，「高飛飛」六檔出閘，挨住外欄閘廂慢了一慢，蘇狄雄因而積極推騎，前速唔算銳利，加上外檔有馬，前面亦有多駒，只能留守在中叠，頭六百米前面及內外檔俱有馬，過了四百米開始推騎，其外邊「長勝福將」走入內檔，「高飛飛」立即偷位拉出外檔，望空下衝刺未算太勁，至最後一百米才撻着，因而後追不及，不敵全程在前佔取先機的「精靈勇駿」，亦無話可說，周日轉爭谷草 1000米，對手大幅減弱，贏馬本錢十足。

　　另於季內總場次655谷草三班1800米，「勝利福星」埋門落重飛成大熱開跑，不料起步大漏閘，閘廂打開後起碼過了一秒才彈出，且不願展步，就此一起步已落後約七、八個馬位，形勢惡劣下柏寶亦無謂勉強，未有急於推騎以保留馬匹體力，就算去到中段得以緊貼馬群，也是因為步速偏慢，轉最後彎位時走二叠，但未有走出更外叠避免蝕位太多亦無可厚非，入正直路才拉出中外檔衝刺，但過了二百五十米才可望空，難得失地極多下一樣有強烈追勁，最後跑第七，距頭馬三個半身位，大漏閘加上1800米略嫌短，有此表現已是及格有餘，今次跑番首本路程2200米，可收復前失。　

Sam