烏拉圭射爆加納

港陌

02/07/2010
文： 壁虎

今晚另一場八強戲碼係烏拉圭對加納，壁虎首次操刀世盃推介，一於搵烏拉圭上盤作見面禮。今屆南美兵強勢搶奪八強半壁江山，威過晒歐洲及非洲兵，正所謂踢波踢道氣，壁虎認為南美兵仍有捧場價值，加上烏拉圭晉級過程較具說服力，前鋒蘇亞雷斯與科蘭合共入五球火力猛，後防亦鮮有犯錯，對住有鋒線靈魂基恩輕傷在身嘅加納，烏拉圭讓平半，上盤抵玩。 （有線61台周六凌晨2時30分直播）


烏拉圭於分組賽一球不失，先後悶和法國及擊敗南非、墨西哥，顯示老帥泰巴尼斯將以往防線不穩陋習改善，配搭「前線三叉戟」科蘭、蘇亞雷斯及卡雲尼攻堅，於Ａ組取得小組首名絕對實至名歸。十六強面對頑強南韓，烏拉圭被追和後仍能頂住對手強攻，最後憑蘇亞雷斯靚波奠勝，可見烏拉圭踢到逆境波，早已成壁虎眼中的四強之選。

有傷基恩孤掌難鳴

踢波雖然唔係一個人的戰爭，但射手腳風順自然更靠得住，何況蘇亞雷斯與隊友科蘭正全力向金靴獎進發。射入三球的蘇亞雷斯明顯已撻着晒，盛傳已獲一眾豪門爭相獻殷勤，加上有取得兩個入球的拍檔科蘭及卡雲尼作掩護，有力射破加納大門。加納射手基恩雖然亦有三球在手，可惜日前操練受傷，雖然無礙上陣，但威力定必大打折扣，加上佢冇蘇亞雷斯咁幸福，前線經常單打獨鬥，壁虎唔認為佢今鋪惡得出樣。


對比兩軍晉級過程，加納明顯被比下去，分組賽靠塞爾維亞手球攞三分，對住澳洲打多個都贏唔到，十六強加時贏美國亦是捱打一方，晉級主要靠對手前鋒失準，呢支非洲唯一命脈相信已到行人止步之時。

南美今屆剋住非洲

軍情方面，烏拉圭雖有中堅高甸受傷，但對比加納有中堅莊拿芬文沙及「名將之後」阿休停賽，烏拉圭唔算蝕底。另外仲有一個數據，今屆南美兵火併非洲兵，全數由南美兵勝出，包括烏拉圭三比○大勝南非、阿根廷一比○勝尼日利亞，及巴西三比一勝科特迪瓦，相信今場冇走雞。