賠率有路捉：紅褲子飛到馬到

魑魅魍魉

　　第六場三班1200米，「紅褲子」今季表現好沉，十四戰只得一個披士，近幾場都係十倍左右，甚至乎三十幾倍大冷，冇人問津。試問邊有人會估到噚日早飛，呢隻馬居然只得83蚊W，位置都只係得19蚊，好明顯有人隔晚落定墊底飛。
   
　　雖然飛數嚟得好突然，不過睇番賽績，絕非冇迹可尋，事關大前仗佢跑同程只係輸畀「六六精英」跑第五名，距離頭馬只係一個馬位，而上仗只係輸在馬鞍滑移，今晚排四檔形勢好，再配合埋噚日呢注早飛，今晚應該有計，信得過。
   
　　騎師王方面，韋達帶離柏寶三場，但係優勢唔算明顯，稱唔上坐定粒六，估計前者一定唔會放慢手腳，肯定乘勢贏多幾場，睇佢今晚騎足八場之餘，「大將風騷」、「雪山神駒」、「如願以償」、「奄尖大少」、「國中之星」同「旺家多寶」都係實力馬，十幾蚊真係有買趁手。

周仲