洪禮賢講馬 YIN''''''''S TALK：鍾意入場睇跑馬

博彩老头

　　先旨聲明唔係賣廣告，或化作promoter，純以個人喜好出發，的確鍾意入馬場睇跑馬，尤其係沙田，亮相圈夠大，加埋地標式的天幕，硬件已經妥當。此外，如果有喺場內逛逛嘅馬友們，亦知設有唔少廂座，如駿星匯、壽司吧等等，可以一邊睇跑馬，一邊享受吓。

　　事實上，當年第一次去駿星匯（當日就真係好似去做promote），可能我大鄉里……嘩！點可能公眾席會有咁好嘅配套？雖然要付出少少錢先可以享用，但都值回票價，落地大玻璃，電視特別多，而最cool係有好似吧枱式的桌面設計，紅撞黑色，簡直型到痺。

　　除了上述硬件之外，主菜自然係賽馬。總認為賽事至少分為四部曲，馬匹賽前準備、賽日亮相、陣上及賽後，絕對不可忽略其中一part，而每一個環節與環節之間，有着連繫性及牽動性，可以話係缺一不可。

　　簡單來說，賽前馬匹冇狀態， 亮相時「死牯牯」，斷唔會有幾成的贏面。又例如，隻馬向來臨場紮紮跳， 舉止帶點輕狂，跑得好同唔好嘅時候都係咁款，但突然有日變得「靜蠅蠅」，行過嘅時候，完全見唔到平日「串串哄」的樣子，或許有人會認為變乖了，唔排除係好事，但又唔會全部係好現象，都係因馬而異。記得季尾「鐵拳」就係喺亮相時有類似形態，以往那分鎖不住的燥底，臨場行亮相圈時居然冇晒，結果跑落亦冇表現。

■ 洪禮賢　馬會賽馬節目主持