阿航搶攻搵急錢

魑魅魍魉

葉楚航經過一個辛勞的馬季，今個夏天盡量爭取與家人共度歡樂時光，繼早前北京行，上周又暢遊日本，趁抖暑實行玩餐飽，至日前才返港重新投入工作；阿航叉完電笑言享受過後山窮水盡，加上剛季頭馬量不幸下跌，係時候收拾心情努力工作，希望於季初贏多啲填番條數。
  






葉楚航從練八季以來，年年成績都唔錯，近季皆排喺練馬師榜前列位置，身為大馬房之主縱使未必腰纏萬貫，但肯定豐衣足食。不過呢位出晒名馬圈第一潮人，去到日本自然忍唔到手，日圓高企之際，全家出動大肆掃貨，唔怪之得返港後同圈中人講笑咁講：去北京使一筆，跟住到東瀛「大出血」，搞到「荷包乾硬化」，梗係要快啲開工，搵番啲補倉啦！
  
潮人東瀛大掃貨


四十出頭嘅葉楚航，平日衣着潮味十足，入場督師當然要西裝筆挺，不過平時晨操作便服打扮時，航哥潮味即刻返晒嚟。上身Bathing Ape，下身Evisu，正宗日本裏原宿標準服飾上晒身，所以每逢到日本，呢位潮人必定大解慳囊，狂入新貨。
  
專用Cap帽夠特色


若只懂人着佢又着，極其量只能稱為潮流奴隸，航哥選擇跳出品牌框框，與潮界名人一樣大玩限量別注，經常帽不離頭的他，所戴的更是以本身名字（Dennis Yip）簡寫DY作設計主調的葉廐專用鴨嘴帽，舊款紅黑兩色，以賽車手所戴的款式作藍本，剛季尾轉型Lorry Cap，前面白色，後面迷彩網，潮味更濃。航哥不妨考慮推出市場發售，隨時橫掃香港潮界，連東瀛潮人教父藤原浩都企埋一邊！
  
人人興旺先頭部隊


上季葉廐只得35場頭馬，比前季倒退10場，練者認為與馬房青黃不接有莫大關係，可幸隨着一季的調整，廐內質新馬匹逐漸成熟，配合新加盟的「利好」及「卡加大師」，可期會有一番新景象。
  



雖然葉楚航今夏並無出外買馬，不過他透露正斟介一匹英國自購馬，希望能購入補充馬房高班兵源。至於同樣來自英國的「人人興旺」，上季第二次出賽已贏千四，大獲航哥好評，今季將是馬房先頭部隊之一，未來可增程扶搖直上。

八運寶鎖定跑馬地錦標

上季葉楚航在快活谷豪奪26W，當中「八運寶」絕對是其代表作。「八運寶」現時已屆115分，出路相當局限，原本開鑼日的特首盃是其合適賽程，不過練者卻未有打算報跑，他解釋說：「『八運寶』前排曾經傷腳，要到本月中後期始安排作慢工作，根本沒有足夠時間備戰特首盃。不過，始終牠是一匹正宗快活谷馬，我會部署牠角逐十二月的跑馬地錦標，將會是此駒今季目標所在。」