洪禮賢講馬：萬事佳穩勝

博彩老头

　　開鑼日終於來臨，在此預祝讀者頭威頭勢，有一個好開始。呢期嘅焦點騎練，何良手馬幾強，望落有半數以上具入圍資格；騎師則最鍾意潘頓，好幾匹馬也有冠軍相。

重心場次：第2場

第四班（60-40分） 1600米

　　「喜勝威」上季尾在同程後上得殿軍，如果當時執正跑法，根本有梗三甲，睇得到分數已降至恰可水平；暑後唔覺身型有明顯壯到，但馬重冇再跌已經係好兆頭，同埋，如果因體型問題影響到佢嘅體力，唞夠復出點都有把握，今場博Ｗ係最佳時機。

　　「天之驕子」上季尾追開，計實力和進度唔比前駒失色，乃第二勢力。「精密紡」整體上係進步，但唔係話走規已完全改好晒，尚幸１檔會教埋佢點跑。

　　「神州八號」講級數唔係冇，季前準備亦好，進度則八分左右。「健康藍莓」主動跑法，如不是受到對手和檔位影響，其實有本錢放到。「偉感」去季同程取第二Ｗ乃超額完成，卻顯示到潛藏，但要擔心此廐經常在首日賽事捧蛋。

第1場

第五班（40-15分）1200米

　　「上浦駿將」上季最後一場後追得第四，唔係外斜，點會冇Ｐ，落五班形勢好得好緊要，係時候出頭。「三陽盛泰」準備唔係好夠，看看七、八成會唔會夠殺。

　　「揀得準」驚10檔唔知點處理，可爭欠穩。「高駿」太輕磅有危險性，排埋好位唔使留咁後，有好冇壞。「華劍寶」和「快都」邊線腳。

第3場

第二班（100-80分）1400米

　　「愛跑得」準得好交關，此類馬陣上點都有番一定能力，有埋內檔之助，更可幫到佢嘅前置跑法。「賞惑」連續兩季俱有急攻舉動，而此程向來係強項，用得韋達賠率都唔熱，仲抵博。

　　「奪寶」若果早課收斂後，在陣上即時轉化成力量，根本唔怕任何對手。「璐悅」跑法主動隨時可扭轉形勢。

第4場

第一班（120-95分）1200米

  
　　「明燈」及「陽明好好」一對蔡廐馬，路程啱又磅輕，或可齊齊在前列歸來。

　　「天久」呢次撞到呢批馬，讓磅唔係多，三歲仔要面臨重大考驗。「好友福」唞暑後進度應是全場最好一匹，係驚跑法蝕啲。「開心歡笑」季前唔覺工序好壓迫，惟上季都係做得咁上吓工夫照捧盃，始終係初出例上名之馬，不妨拖一注。

第5場

第五班（40-15分）1400米

　　「晨速」上季初出前冇大閘，再之前兩季則有此安排，結果以上季成績最曳，今季有番大閘至復出，而首戰即跑唯一贏馬路程，擺明郁手。

　　「分秒必爭」老馬唞完叉足電，仲有好檔，秤落條件ok。「威揚」唔明上季拉停後會冇晒mood，落班卻好有殺傷力。「愛拼者贏」和「彩旗飄飄」納於邊線。


第6場

第四班（60-40分）1200米

　　「友利多」唔係排外檔，對佢信心更大，剩係講速度呢方面，唔比此等四班馬輸蝕。「進取」準備充分，目標擺在首回合，加埋配件，更覺有鬥志。

　　「肥仔糖」之前有腳傷，雖然冇耐pass番，但唔知影響成點。「勁高手」及「勁多勝」，前駒有質卻不是此程馬，後駒情況則調轉，只限作腳。

第7場

第二班（100-80分）1000米

　　「萬事佳」往績準到冇人有，6場全部上晒名，重要場場係直路賽，呢次降班，信心十足。

　　「旅英駿駒」及「風火神駒」同樣係路程專家，屬前駒勁敵。「海之宏」級數會比下去，休出好卻係有眼見，或可爭Ｐ。「樂意洋洋」上季尾已覺有起色，再經過暑期調節，應快可走出低谷。


第8場
第三班（80-60分）1200米

　　「讚賞」一出即上名，輸畀開竅後嘅「常山鳳寶」賽績唔差（頭馬造出該程第三快時間），暑後進度嚟得快，想等都唔得。「錢照贏」未完全收斂，尚在跑速度的階段，睇吓放唔放得到。

　　「自由勝」大件頭，擔心隔咁耐冇跑或狀況較慢熱，不過，睇外觀唔錯，三班冇問題。「中國心」及「高手」唔似有冠軍相，Ｐ望多啲。

第9場

第三班（80-60分）1400米

　　「愛蓮說」一如不少何廐馬，季初狀態嚟得好，今次９檔係有風險，但只要唔係大外叠，以佢段段有跑法，有權帶返。「吉利多」唔係操好多，但公認超四班之馬，進一步成熟後可變身。

　　「旅遊大亨」與「好勇駿」情況差不多，重磅係憂慮，分量一定夠。

第10場

第三班（80-60分）1400米

　　「福將臨門」分數差唔多，好在有1檔幫手，賽事形勢會幫一把。「寶貝王子」成套準備與上季幾相似，用埋柏寶，似乎想再於開鑼攞威。

　　「高一線」及「大衛精神」，單講水準唔錯，只係能力未證明太多。「較量」上季贏馬一役水準唔高，呢次外檔不易攞著數。後上馬中，「好有勝」態況合格有餘。