洪禮賢講馬：天下兵器分利

魑魅魍魉

　　今晚谷草B欄，預計會落埋雨，賽事模式似乎對後上馬冇乜着數，都係單調嘅格局，好檔及主動嘅馬秤先。騎師方面，一眾華將依然有唔錯坐騎，幾位外籍高手要有大手交易，暫時都唔係咁易。

重心場次：第4場　第四班（60-40分）1650米

　　「永得勝」8月頭始復課，唔算特別早，但工夫一經加壓，好快迫得起狀態。而早前在嘉年華大閘，同佢一齊喺前列過終點嗰幾匹馬，全部初出都跑得好，如「奔騰飛駒」、「愛拼者贏」等，直接顯示到該閘的水準。今場排2檔起步，唔覺好多對手會攪亂檔，只要畀佢放得順，隨時帶返。

　　「奄尖大少」大閘後追勢頭不算勁，狀態係未夠，尊重一向在此程往績，拖腳。「新意思」唔叻，只值四班中級馬，好在熱完身兼返細場，處境好番。

　　「福到財星」係擔心冇大閘。「消費王」初出1400米輸近，嚴格嚟講，如果直路唔係攞位太猶豫，發力點必可提早，或衝得更勁，今場可能才是目標，配搭稍弱都也不宜錯過。

第1場　第四班（60-40分）1200米　

　　「千兩寶寶」最近試跑有明顯唔同，過促的舉止戒咗，但唔係因冇火死吓死吓，試得快既不吃力又夠內斂，預期目前跑法會更彈性，能力也升值，除非8檔頭頭碰着黑，如果唔係，三甲實有。「化工之昇」試大閘早段好主動，希望真係步出低潮期，計分筍到暈。

　　「當旺」9檔處境會係點？最多爭腳。「揀得準」長期身形略胖，唔討好。「中國好」初出跑法錯晒，大敗可以當睇唔到，忽然轉場轉裝備，小心。「財源來」大閘見唔到慢閘毛病，貫注力亦唔錯。

第2場　第四班（60-40分）1200米

　　「家橋」預料有馬扯快早段，遇上一組啱夾的形勢，此駒易咬住靚位，而1200米比1000米仲啱，再Ｗ唔難。「飛魚駿王」和「天子駕六」谷閘拉士反應唔算好吸引，省完之後則以前駒進度較好。

　　「中華英雄」落番四班易搵食，熱完身返谷草，安排似樣。「超勝」準備上冇上季初做得咁充裕，近況係未夠，但班利馬唔反對拖。「甜蜜至上」跑出水準，四班谷草邊個都唔怕。

第3場　第五班（40-15分）1200米

　　「心路」評分低無可低，根本唔能夠代表甚麼。而轉馬房後算係做得工夫，只要交到七八成功力，要贏冇難度。「智勇雙全」及「厲行星」一起試閘，論走位論餘勢，前駒醒啲。

　　「團隊福星」上次臨場已冇上季咁傻，行嚟仲係有唔自在，卻已好咗好多，唯一擔心係開氣後可能一哩先啱。「齊鼓掌」希望好似「肥仔糖」一樣，洩了一場火，陣上操控乖啲。

第5場　第三班（80-60分）1000米

　　「此時此刻」和「金鑽龍華」應該差唔多分量，前駒上季尾入Ｐ嗰場賽事，係極快時間，那席季軍具指標性，後駒熱身後匆出，手法啱數，加上對手唔同晒，少了阻力，有權一Ｑ返。

　　「喜盛龍」有班，路程卻好短，如出現超快頭段則有懵博。「應變計劃」及「帶利財子」冇欄好難跑。「多多昇」要靠步速快帶挈。「勝在分秒」大閘推落唔多。「同心威駿」唔係排9檔，應該係馬膽。

第6場　第四班（65-40分）1650米

　　「多贏勁駒」1200米尚且後上得殿軍，返回一哩惡到出汁，未交代之馬，有態唔會等。「睡得好」與前駒的分野在於冇熱身，點都蝕多少。

　　「歡騰」7檔，如過分順其自然演繹，瓜梗，但計馬在此班吃得開。「洪福齊來」上次因天雨影響情緒，跑成點唔使計，終肯轉中程，大冷要博。「搏得威」1檔配合守好位跑法，但唔知10歲退化有幾大。

第7場　第三班（80-60分）1200米

　　「戰士」休出向來好，雖然之前試大閘，略嫌不夠自動性，希望轉配件會起到刺激作用，而目前評已達至恰可水平。「海王子」谷草1200米曾與「大進」串Ｑ，而上季有一出即勝紀錄，整體條件及格。

　　「威威財星」與「祥勝愛駒」排中外檔，要睇早段的際遇。「一路奇兵」初上三班要考驗。「期望」唔夠「方」。「勁有盈」三班輕磅加好位，或會有Ｐ。

第8場　第三班（80-60分）1650米

　　「天下兵器」上場唔係直路遲搵位，有位置唔會意外。而自從閹後，只係得腳痛嗰場跑得唔好，顯示到分數已有危險性，希望今次換人，在發揮上可稱職。「和諧大使」未夠水準，尊重對上兩季初出例好賽績，作腳。「星際雄師」在這個多月的準備裡，進展比預期快。「帝豪名駒」希望開咗氣，今場唔好放。「精算拍檔」撞到一場早段唔慢場合，未必有運行。