洪禮賢講馬：紅跑車 雙重優惠

博彩老头

　　第九場一班1400米。「好友福」初出比預期失色，直路頭一度拍住頭馬「天久」一齊，但衝落唔係勁，係咪因曾經被擯影響衝刺力？還是初出未開氣嘅關係？可能成因各有一半。總之，跑完之後朝早係有好嘅轉變，日前落草地走兩段，全程放鬆心情，經過一場實戰洩咗火，明顯冇初出之前試跑咁好風頭，但咁嘅款轉跑 1400米有好冇壞，除非被重磅打壓，如果唔係，三甲走唔甩。

　　第十場三班1400米。「紅跑車」上場賽後騎師被問話，為前中段過於落後解話，睇完全文，再睇番沿途處理手法嘅話，唔係太認同柏寶嘅理據，然而，隻馬可以全程包尾而追到入Ｑ，真係好堅！事關當日10場三甲馬之中，直路由最後位置而追到上名，除咗佢之外，只係得「自由勝」，為數咁少，就知有幾叻及指標性。今場跑低半班，再用小何減多10磅，簡直係雙重優惠，只要唔係「舞」唔掂，發揮到隻馬後勁，唔難打低此批對手。