洪禮賢講馬：好友福 後上殺晒

猪拉多纳

　　今日姚、葉、蔡廐幾大堆頭，其中只係得番後者仍守齋，如果以今期咁嘅兵馬，一場都贏唔到，我諗擁躉都幾「濕滯」！至於，今期唔少場合，好幾位華將都有啲冷冷哋嘅坐騎，要有高回報，要吼實。

重心場次：第1場　第四班（60-40分） 1000米

　　「好辣椒」能力唔會隨住暑後有進，但唞完一輪之後，狀態嘅進程嚟得幾好，由早期試跑有氣響聲兼唔順，再到近期快試，自動波之餘又冇氣響，真係睇住轉好；佢嘅跑法段段係得咁多，只係5檔希望喺早段cut到去外欄，憑速度及狀態入到三甲，由於有賠率，所以先用嚟行頭。

　　「領航人」8月中試大閘已好，但實力又係唔叻，像前駒一樣，以勇態去打拼。「可圈可点」5場四班此程，有4場跑P，總算有點牙力。「好新聞」大閘冇配件，一步都冇唔奇，實在較早時間，試跑已見走勢幾「行」，轉馬房做夠嘢先跑，用埋柏寶兼有面箍，有晒變身條件。

　　「超力駒」曾試過縮到此程入圍（相隔日子與今賽差唔多），但剛仗走勢稍失色。

第2場　第四班（60-40分）1200米

　　「勇蹄飛」排內檔對發揮幫好多，而上場大敗因沿途外叠，開氣後令狀態更紮實，不難交回應有水準。「日月暉華」上賽名次後，但唔代表拉士衝得唔勁（最後1百米仲被阻擋），既然一再從好後位置追上，轉田草無可厚非。「快意」早前試大閘幾懶，但近試走勢則主動了，降班也是變數。「樂融融」徐廐初出馬有戒心。「齊勝」初出放得過急，開完氣洩了火，或可放入三甲。

第3場　第三班（80-60分）1200米

　　「自由勝」初出已經博定先，後上得Ｐ算本事，希望跑過一場，減少陣上懶性，咁就冇咁難追。「如日方中」略嫌唔夠火，不過，落番班，唔夠態亦可能夠爭。

　　「爪皇盛水」埋門趕工夫，進度未夠，但根據上季初出走勢，應有班。「勁信心」檔好及路程啱，正路腳。「有莊有閑」冇大閘程序，點都要擔心。「獵豹小子」插三班首戰，乃一大考驗。「大旋風」熱完身仍不足以令水準提高。

第4場　第五班（40-15分）1400米

　　「大唐勇將」初出唔係陣中多番受妨礙，未必會留得咁後，此乃追唔切的主因。今場加面箍會幫到，轉番此程又會比谷草一哩好，只要轉用小何唔係「因加得減」，有望效法上季一樣，熱完身即勝。

　　「極速寶寶」試大閘省落唔多，但喜見出閘快咗，兼且分數係過低了。「雄獅寶貝」又係分數減過籠。「勁飛飛」兩大閘走勢一般，不過降班好有推動力。「華劍寶」好開，條件四正。

第5場　第四班（60-40分）1600米

　　「我愛您」比上季壯身，呢點係暑後最明顯變化，就算朝早走勢係唔多銳利，由於有埋降班條件，仍會看好。「健康藍莓」贏開，又係對住一大批上場對手，多負8磅也不怕。

　　「天之驕子」唔覺狀態有唔妥，唯一可解釋上賽之敗，就係未開氣，所以，由熱變冷更值博。「喜勝威」剛仗大致跑盡，有過一場熱身會着數，但都係三三四四。「名人」遇上有步速場合唔易搵食。「神州八號」外檔會加添走樣的可能性。

第6場　第四班（60-40分）1400米

　　「勁高手」上賽前已指出，短途唔易追，有Ｐ已符合預期，加程係時候出頭。「芙蓉威龍」及「按得醒」四班超級，能夠衝擊到前駒，則要視乎彼此陣上發揮。

　　「強駒」少有在季初跑得好，或是狀態早到的先兆。「光芒四射」唔易跑得好，因成日會內閃。「愛睦善」回到田草，能力大幅增值。「紅冠子」有點寄望，可留意走勢。「愛蓮說」怕外檔令早段走多咗，埋唔到尾。

第7場　第三班（80-60分）1200米

　　三強對峙，「好利利」、「金堡龍華」和「蜚聲」，跑法上應以前駒最機動，就算重磅亦讓得起，作膽。「金堡龍華」暑後增磅係好現象，預期仍有上升空間。「蜚聲」對手比上季尾那批差唔多，繼續要考驗。

　　「飛快勇」大閘冇走勢，但評分太筍了。「卡加精神」輕磅會幫到，但級數蝕晒。「精英財星」上番三班未必失勢。

第8場　第三班（80-60分）1600米

　　「一言為定」和「千江映月」級數比對手優勝，前駒由小何變了都爾，競爭力會升級，就算受讓磅少了，依然有權反先。

　　「不言而喻」如果低潮期過了，目前分數要爭取表現唔難。「氣定神閒」及「迎利多」邊線分子。「神風先驅」1600米略短，但比上賽路程為佳。「較量」實力已見盡。

第9場　第一班（115-90分）1400米

　　「好友福」開完氣上1400米，處理妥當，只要今場出現正常偏快步速，以佢咁強後勁，唔難爆上嚟。「愛跑得」初出快時間放到，銳開上班都唔怕。

　　「卓爾非凡」白德民超磅肯跑已是正面條件，計實力在一班負輕磅也夠爭。「夢幻組合」跑完短途上1400米，時間上啱啱好。「金獅威將」唔係14檔，會較有信心。「陽明好好」及「明燈」唔係檔位，就係路程有上問題。

第10場　第三班（85-60分）1400米

　　「紅跑車」上場早段大落後，仍可後上入Ｐ，甚有代表性，只要小何處理上做得啱，而步速利追，可望補中。

　　「奪寶」初出碰上「愛跑得」，形勢及實力輸了，今次落班則加強殺傷力。「六六精英」初出比預期冇咁好，熱完身則會唔同。「三和之星」外檔及跑法，早段可能極失勢；「易搏贏」亦然。

　　「雄心馬主」太輕磅，如果際遇不太壞，會有Ｐ。「高手」上場斷得太快。