洪禮賢講馬：避免「無啦啦」整道疤

港陌

　　跑了幾期賽事，相繼有騎師停賽，絕對唔係咩新聞，如果冇人被罰先至稀奇！事實上，有時騎師們陣上為博好位、搶靚跑線而犯規，法理不合，但情理上可理解，佢哋唔係有一夥恨贏的心，睬你都傻，喺後面望風景，求其入直路打幾鞭了事，吹佢唔脹。

競爭性跑法可接受

　　又例如，好多時賽後報告會見到：「小組譴責某某，並告誡他日後在類似情況下，必須確保已充分帶離才轉移跑線。」假設唔係受隻馬走規問題影響，騎師們轉線梗係想泊好位，如果要走出大外叠，點會因入線cut到對手，大可隨便「飛」出去，又或是仿似中線有鬼，硬係唔移入，一路走大外叠，此類「外遊」至北歐的跑法，我們唔係冇見過，亦唔係百年才一遇吧！至於，因未帶離轉線而被譴責或告誡，賽例唔鼓勵咁做，因安全至上，畀人照肺幾句好應該，但騎師們具競爭性的跑法，才是我們希望睇到，情理上可接受。

　　之但係，今季才跑了幾期賽事，卻一再於比賽途中，睇到有些騎師唔夠落力，就連小組都喺賽後有指出：「某某有責任力策坐騎至終點。」究竟係咩原因令佢哋唔盡力呢？我唔相信當中有暗黑的成因，如果騎師們夠膽死喺陣中，尤其喺直路上，交出連未開眼BB都睇到嘅低手騎功，除了想被釘牌，冇咩想博啦！？

　　如果騎師只為慳啲氣力，而唔做戲做全套，最後直路都唔騎埋落去，一個唔好彩，整鋪判斷錯誤，終點線唔騎就咁冇咗個P，咁樣衰幾日，又有咩為！？