高清睇跑馬：最上回勇 主項W得

博彩老头

　　周四谷戰，第六場「最上」上季初連續四戰做阿二，好在鄭俊偉未有一本通書睇到老，配華將次次後追不及，至總場次288谷草1200米改配韋達，雖然只跑第五未能上名，但礙於十二檔起步，走位極之被動，又遇上超慢步速，三甲不入值得原諒，韋達經此戰已了解其性能，接戰總場次324同一路程終於坐正，且贏來清脆利落，直路一踩油輕鬆贏半個身位，再出熱倒，實則途中不良於行，非力有不逮。

　　咪以為「最上」傷後一沉不振，上仗季內初出，即總場次021田草1000米，久休七個月跑來亦似模似樣，若非出閘論盡失了先機，以其超強後勁，締造全場最快末段時間，分分鐘贏埋都唔出奇，再看過往田草八戰只獲一次亞軍，非最佳路程也有如此好走勢，周四跑番其主項谷草1200米，多匹快馬在陣，步速不會慢，可期重開勝門。

　　第五場「回鄉精神」，上季幾乎次次成大冷門，但第二度出戰谷草1650米卻突然有飛，即上季總場次635，並取得來港首次上名，睇番過程，跑來搶口，都爾因此力留，尚要入到直路遲遲發力致後追不及，不敵沿途慳位兼早過佢發力嘅「玩具神話」，可以話輸在搶口，亦可話輸在發揮，及後兩戰當然大把人追捧，可惜重口毛病未改，總場次742更在閘內扭計致起步失先機，結果鎩羽而歸。倉主心有不甘，今季開操不久已為牠加上眼罩，經過近一個月訓練，上仗季內首戰總場次017，確見口勁收斂，美中不足排外檔被迫留後，更弊最後100米被阻苦無去路，坐包廂而失Q，今次捲土重來仍跑一哩，戰意必堅，四班亦肯定有優勢，縱使檔劣也要追多次。

Sam