楝悉先機：好旺財 形勢一流

魑魅魍魉

　　唔係阿棟導人迷信，有時唔信邪唔得，記憶中，好多時跑親快活谷日馬，梗係有部分場合爆到七彩，一百幾十倍嘅大冷門，都會走到出嚟，賽前固然估唔到啦，但賽後一樣解釋唔到，佢哋點樣爆出嚟！所以奉勸鍾意玩馬嘅老友，呢期點樣運用注碼，真係要諗清諗楚至好，必要時縮吓注亦無妨！

　　第三場四班1800米。「好旺財」上年差唔多搏足一季，依然贏唔到，唔會單係因為冇運，呢類馬根本唔易出頭，由於冇咩板斧關係，陣上要對手演出失準，佢先至有機可乘。所以，就算經過暑假，我都唔會高估佢嘅能力，充其量只值四班中堅。慶幸今場遇到嘅馬真係唔叻，畀佢帶順咗，場地又淋淋地，未必追得切。

福喜跑1800米仲好

　　第七場三班1800米。「福喜」啱啱跑到第二名，當時判佢狀態頂多8成，返到終點只係輸少少，阿楝真係跌眼鏡。

　　正常預測，「福喜」跑完一場進展更好，今場會更具威力，同埋，現階段跑此程可能比一哩更好，總之呢類馬咁恨贏，搞得番健康點會唔搏落去。

　　第十場三班1650米。「寶貝王子」評分上到77，要再大幅上升唔係冇可能，不過已經唔係易，如果仲係咁好世界，使乜用何澤堯，頂磅咪頂磅，睇嚟方仔都知匹馬冇幾多分喺手，唔借助減磅，好難再爭取成績。趁新勝鼓其勇氣，C欄1檔具先天優勢，路程亦冇問題，值得再追。

點買法

　　今日提供嗰3匹馬，除咗「好旺財」隔晚廿幾蚊之外，餘下兩駒都幾好分，但問心嗰句， 博W其實唔划算，因為全部嘅勝出率都唔高，「好旺財」更係未贏過， 所以，保守少少位置3串1好過，一注本錢，啱心水的話，買大啲亦贊成，起碼唔犯本嘛！

陳華棟