賠率有路捉：當旺早飛硬淨

魑魅魍魉

　　第二場四班1000米，12匹參戰馬好參差，唔少連基本速度都欠奉。大熱門落喺韋達坐騎「清新空氣」身上唔意外，但次熱係「當旺」，而且只得45 蚊W、15蚊P，比預期熱得多，加上只係用湯智傑都咁多飛，可以反映今次隔夜飛數幾咁硬淨。

　　留意賽績，此駒上季贏馬一役正正係谷草日賽，當日熱透一放到底，同今日情況好相似，小心好夢重溫呀。

　　第九場二班一哩，「玉峽生輝」早飛位置成為大熱，只得12 蚊，相信冇乜馬迷估計到。睇番隻馬上季尾已經接近番，上仗季內復出喺田草都輸得近，差不多到位。

　　記得季初胡森隻「信賴」隔晚位置熱透，最後果然有三甲，推算呢注飛嚟自有識之士，既然一早落定大大注墊底P，各位真係要小心呢注聰明錢呀。

　　騎師王方面， 韋達出足十場， 比柏寶多一駒，不過後者整體實力平均得多，「野馬」、「心路」、「鎖定目標」及「歡呼星」都坐位望贏，應該穩陣好多，熱門都捧得過。

周仲