洪禮賢講馬：柏寶「牛油手」經典

港陌

　　向來尊重數據，暑期稿已多次指出此點，因為數據（或數字）唔會呃人，當然，一切會有時間性，以及季節性，長路總會有盡時，但如果在未爆煲之前，識得趨吉避凶，多少對下注有幫助，就算未必在選擇上帶來多大的指引，卻會有潛在的回報，有可能會令閣下刪減部分無謂注項。

　　今季跑了7期賽事，暫時未有一位騎師可在騎師王冧莊，任憑韋達或柏寶，如何在某期賽事兵力點勁點醒，總之，啱啱做完騎師王的話，下期一定冇着落，像23/9那期，該日韋達在騎師王走地賠率，一度賣到得1.08倍，未跑到第七場已有3W在手，諗住都幾老定啦！但柏寶在往後場次全部入三甲，以4分之微搞掂。所以，冇兩鋪的數據一日未斷，依然不宜太熱情去拗頸。此外，目前仍未有連捷馬產生，剛周日幾匹新勝馬，熱又瓜冷又仆，真係幾邪。
　　
　　講開邪，剛周日柏寶都算經典，唔知以為佢有對「牛油手」，滑嘟嘟是也，騎「長勝」尾段韁繩擸唔實，之後騎「揀得正」仲誇張，直情「鬆泡泡」！嘩，話晒係本地二哥，點解演繹一再蝦碌，真令人費煞思量！？