馬主論戰

魑魅魍魉

電訊巨星有冷味

　　第二場1200米，我哋隻「電訊巨星」有份上陣，話晒上季響同程贏過馬，今次落番嚟四班跑，應該有一定競爭力，同場名氣馬唔少，跑入三甲一席都會好分。另外推介第五場「好旺寶」，上次唞咁耐初出都贏得輕鬆，質素必定唔簡單，呢類馬唔會有任何保留，一定搏得就搏，繼續跑直路賽係穩中求勝嘅部署，連捷機會高唱。

鐳射槍瞄準發射

　　今日我哋有兩隻馬上陣，其中「衝鋒槍」跑國慶盃，呢隻馬始終都係谷草先啱，何況對手好強，要突圍唔容易。至於「鐳射槍」，上場響1400米追入一席第四，表現有進展，今日增程跑1600米，希望有機會拉番一場頭馬喇！另一匹心水係尾場「福將臨門」，上仗早段放得急都輸唔遠，六歲馬近況大勇，一定搏得就搏。

軍策令轉倉即拼

　　賭馬向來講求值博率，今次再向有分頭嘅馬埋手，先揀第五場「軍策令」，上季響直路賽同「萬事佳」互有勝負，實力唔簡單，今季跑咗一場冇表現即轉去薛廐，估計馬房都唔會怠慢。另外鍾意第三場「朝東之星」，上季尾開齋之役贏到對手冇得跑，響五班一定有着數，上仗唔能夠順放先輸，小心施回馬槍。