楝悉先機：有莊有閑減磅爆

港陌

　　呢期賽事韋達坐騎滿額，馬就多嘞，但唔見得連場惡馬，難聽啲講，有小部分真係執到錢都未必敢買。反之，柏寶同潘頓情況就唔同，唔少坐騎具有相當實力，仲係唔會冇熱到飛起嗰類，如果各位馬迷鍾意玩吓騎師王，可以打吓呢兩位仁兄嘅主意。

　　第五場四班1600米草地。「勁高手」連跑3場只得三、四名，成績令好多人，包括阿棟都跌晒眼鏡，初出1200米可以話路短，跟住上1400米冇大進步，上場1600米又係咁，係咪過分高估，我都唔敢一口咬定，唯一再畀藉口佢係因為今次對手算係最弱1場，斬唔斬纜睇埋今場。

蜚聲加程配合馬性

　　第八場第三班1400米草地。「蜚聲」今季初出梗頸四，表現未符預期，如果佢喺直路完全冇走勢還好，最慘就係衝衝吓唔勁，判佢係當時狀態不夠？未經熱身？定係路短關係？希望係後者。難得柏寶係都唔放手，要是加程真係配合到馬性，有權收復失地。

　　第九場三班1200米草地。「有莊有閑」上季初出贏1400米，難度好高，而那役不少蹄下敗將，之後各有佳績，進一步顯出其頭馬水準厲害。

　　「有莊有閑」到了今季初出跑同程，沿途守靚位之下，入到直路冇晒力，落敗全因進度問題，因臨場見佢又肥又腫。腳患馬跑完1場可以短期內再出，體重又下降，絕對係好事，咁輕磅又好位，隨時爆得。

點買法

　　開場白睇好柏寶坐騎， 所以揀重心場合，梗係搵佢手執惡馬嘅場次，第8場已經係其中之一，捧「蜚聲」嘅話，隔夜獨贏3個開有多，合情合理，博得過。賭Q 同樣吼呢場， 分大細注，s拖q、e呢條買大，細注就s 拖w、u， 呢兩瓣有肉食就買埋PQ。

陳華棟