馬主論戰

魑魅魍魉

黎海榮舞掂大關刀

　　自從黎海榮遠征日本成功後，手風真係順到不得了，剛戰又爆咗隻「財富之星」。今次我繼續睇好佢有馬贏，頭場「高駿」評分已屆新低，上場季內初出跑第四走勢唔曳，今次換黎海榮騎應有更進步演出。

　　另外，第二場「大關刀」向來跑法主動，今次排三檔若黎海榮一早搶欄，話唔定就此一放到底，必須吼實。

張敬山

天外之天質素高

　　今日我哋隻「鐳射槍」有份上陣，呢隻馬近兩場都輸唔遠，今次用何澤堯減磅上陣，希望有好表現喇。

　　講番心水，鍾意第五場「天外之天」，上場狀態只係初起，已經能夠贏馬，三歲馬質素肯定高，今次再跑1400米要贏唔難。另外推介第七場「川河勁駒」，在港三戰兩勝，響三班一定係超級馬，可以掃晒。

寇鴻萍、梁廷鏘

安御冷門諗得過

　　雖然今日有唔少明星馬上陣，但部分場合形勢似明實暗，都係吼冷馬穩陣。鍾意第九場「安御」，上季試過同「天久」鬥到叮噹馬頭，響二班必定有着數，今次用蘇狄雄操刀，必定備受忽視，小心殺個措手不及。另外推介第八場「沙貝利」，上場跑1600米後上如箭，擺明仲有分在手，用柏威廉示人以弱，話唔定先係馬房主力。

任達華