洪禮賢講馬：真係寶加八分濕濕碎

博彩老头

　　柏寶停賽，韋達繼續成手馬，但唔係件件精品，小心又好似啱啱谷草夜賽咁，埋單得1Ｐ，當然，如果計佢周日嗰手馬，1場Ｗ都冇嘅話，擁躉嘅下場會好慘吓，不過，真係唔好太過理想化，去度佢嘅坐騎實力。

　　唔吼韋達，又有邊個好信？好大機會係白德民，唔單止因為佢多馬騎，10匹坐騎之中，睇唔上眼區區三兩匹咋，今期整體坐騎真係超晒，如果周日佢冇乜景，某程度上，賽果係幾摧毀性。

　　第四場四班1600米。「真係寶」贏完1400米轉到此程（同日可再跑第五場），風險唔係冇，但上場贏馬姿態堅得，唔係一般四班馬可以做得到，只係加8分濕碎到暈。

　　此駒今季季前準備，唔似得上季咁，一開操冇耐就唞，已經係好現象。

　　同時，朝早性情與以前比較，明顯定性咗，最緊要仲係轉款後，喺陣上有成績交出。有睇上場賽事嘅話，都知佢塞到最後200米先至望空到，如果畀着以前嗰隻「真係寶」，咁樣窒步一定亂晒籠，但佢依家叻到咁短程一樣爆到上嚟，反過嚟贏番二馬「高耀之威」接近1個身位，證明養得番之後，能力在四班好把炮。今場只係多負8磅，而對住一批仲比剛仗失色嘅對手，睇唔到連捷會有阻力。