楝悉先機：紅衣叻叻注定熱食

港陌

　　冇咗柏寶，韋達今日會唔會好世界，唔係冇可能，但佢嘅馬要小心揀擇，係又買，唔係又買，子彈夠唔夠係一個問題，換嚟谷氣又係另一問題，事關佢已經有一排冇頭馬交出，馬場始終係英雄地，話之你係何方神聖，手風唔順起上嚟，真係識飛都冇用，要吼佢嘅馬，諗清諗楚至好擺銀両。

　　第二場四班1200米。「紅衣叻叻」初出捧到兩倍，鞍上人係令到隻馬過熱嘅主因，談及陣上走勢，由於初出新鮮感太重，早段用多咗，令到末段連位置都捱唔到。希望熱身之後，洩咗啖虛火，呢次陣上聽聽話話，睇樣點似四班馬，注定係要熱食。

喜勁飛級數高

　　第三場二班1800米。「喜勁飛」上場因為腳傷，唞咗10個月，一出就跑1600米，直路初段似模似樣，誰不知最後100米自己腳軟，要怪就怪隔得耐唔夠氣！呢次進軍1800米，路程性能有疑問，但級數應該高晒，如果隻馬進度真係返番嚟，唔應該有對手夠佢撼。

　　第十場三班1600米。「一言為定」聽講目標係打吡，但年年好多馬都係咁講，但凡四歲一人有一個夢想，能否實現要睇好多因素，但佢跑過畀我地睇，上場贏到完全冇對手，級數有，搶分決心又夠，所以，目前留在三班，任務好清晰，贏得幾遠就幾遠。今仗用細路仔何澤堯，卸去不少加磅壓力，喺三班負 123磅，優勢凸顯。


點買法

　　今日會有唔少賠率好熱嘅馬出現，但唔代表係愈熱愈穩，有啲係陷阱，擺銀落去邊隻要分清。第三場馬少少，「喜勁飛」獨贏唔算冇肉食，熱啲唔緊要。買Q重點場合都係放喺同一場，腳拖「沙貝利」和「紅跑車」，買三重彩要埋t、8一對。

陳華棟