洪禮賢講馬：智友 收復失地

博彩老头

　　第九場三班1200米。「開心自在」唔少轉飯鑊嘅廐友，都係喺轉馬房第二回合交代，從上季起嘅例子，隨便數數已有「威威財星」、「金堡龍華」、「心路」，甚至乎剛捧沙田錦標嘅「自由好」亦然，當中究竟係隻馬進度問題，抑或練者手法使然，令到有咁嘅現象出現，總之趨勢係咁，唔信唔信又1場，話唔定「開心自在」都係行呢條路。事實上，剛賽前已指出此駒狀態未夠，但見佢在前路唔多暢通劣勢下，拉士仍然爆得吓，充分顯示分利嘅優勢；省過1場唔覺進度有好大進展，惟昨日見佢踱步時幾神氣，點都比初出實淨，入圍機會大。

　　第十場三班1650米。「智友」上場跑完方仔接馬時，疑似鬧爆小何，有冇睇錯佢當時嘅面部表情，同埋身體語言，唔排除有呢個可能，惟該役小何嘅攞位又真係蝕到盡，若然唔係出彎賣大包飛出十幾叠，睇衝勢未必追唔切頭馬；對準同一路程，出動到巫斯義，唔難補中。