洪禮賢講馬：好兄弟 食正形勢

猪拉多纳

　　第六場三班1650米。唔經唔覺，原來「好兄弟」有接近兩年冇贏過，馬在中年，評分卻長期在8字頭左近，喺三班要負重，上班挑戰又高不就，真係唔易攞甜頭。而今場亦唔見得形勢好成點，131磅冇咩so，但眼見上場唔多啱路程差啲有P，演出比自己估計略好，照理落番一哩會仲好。事實上，剛仗1800米擺明勉強，跑法又過於進取，可以頂到臨尾最後幾步，從賽事中反映佢正處於作戰期高點；今場因應有三兩匹前領馬有份跑，形成早段未必慢，假如「好兄弟」又肯留番住跑，賽事形勢實夾到，入P機會幾大。

　　第七場二班1800米。「國中之星」季內已跑3場，冇邊場特別有走勢，只係輸得唔遠，長期混在中游位置。但如果比較佢陣中競爭力， 其實1 場比1 場升值，（上場一哩最後幾十米仍似有P）；跑頭累積夠，終於等到最有把握路程，係時候做番齣好戲。