借題發揮：大摩曬冷唔係講笑 皇帝旨令難抗拒

魑魅魍魉

　　咩叫做大軍壓境？只要一睇今期大摩嘅陣式，已經完全感受得到，當然，有時出馬多唔係大晒，剩係睇吓啱啱禮拜三，阿蔡夠出馬8隻啦，好多仲係有飛，咁又點呀！結果咪好多要用個放大鏡先至搵到。

　　今期我亦唔排除係自己諗多咗，摩廐出馬質量有晒，純粹係美麗誤會。但數吓1隻，數吓再1隻，已經唔計佢馬會盃嗰場揸晒弗嘞，其餘場次嘅馬，唔少缺點冇乜，除咗可能熱啲 ！

　　先講隻「皇帝旨令」，邊有咁着數，贏嚟贏去依然喺四班跑，加佢9分仲夠資格跑65分上限賽事，今場對住一大堆普通貨色，好多係搏極未贏，或已經好耐冇贏過嘅馬，形勢真係一面倒。

　　「心歡笑」又點呢？贏完嘞，終於交代咗，嚟到今場，賽績會唔會忽然走樣，除非氣管又多血啦，如果唔係，你睇佢上次以咩時間咩姿態嚟贏，返上三班跑，有埋個1檔，條件唔會及唔上同場又係新勝嘅「威威財星」。數到尾場「曬冷王」，係咪打吡武器唔知，上場1200米根本唔啱路程，差啲有第二，先知佢天才橫溢，跑完一場即加程，急於爭分啦！　

Jack