洪禮賢講馬：盈驥與睡得好勿混為一談

猪拉多纳

　　如果用殺雞儆猴，或者雙重標準，形容都爾被罰停賽事件，其實唔係幾啱數，因為佢同「睡得好」事件嘅嚴重性，同埋箇中嘅轉折位，某程度上真係唔一樣，當然，喺度再講多次（其實之前已提及），個人唔認為馬偉昌在「睡得好」處理上啱晒，因為洪某不才，到依家都解唔開那役兩個問號（feel到隻馬抗拒被鞭點解仲要打？推騎力度唔夠watt？），所以唔覺佢發揮稱職。但那役「睡得好」確切一度內閃，唔係冇疑點利益歸於被告嘅伏線。

　　至於都爾嘅「盈驥」，成條直路完全睇唔到有咩影響到個騎師，唔騎埋壓線前嗰一步，因「東方駿馬」喺佢外側衝上嚟一刻，梁家俊馬鞭冇「了」到都爾，兩駒又冇任何身體上接觸。最攞命仲係都爾一路打緊鞭，當時嘅意識形態，唔覺有唔打鞭而轉雙手齋推迹象，但講到尾致命傷還是卓利，明明終點前畀「西域雄心」撞到，佢完全冇怯場，「飛魚駿王」繼續騎到上耳仔，假使佢停止催騎一步，都爾保得住季軍，可能事態發展冇咁嚴重。

　　根據近年像都爾類似事件，其實呢次罰則唔算重手，5日停賽係min pay，因08年2月嘅「不得了」，杜鵬志爭緊第三名但拉士喺大外檔唔願騎，停賽日數都係5日。吖，上季尾原來都爾也曾因「喜運財星」末段唔騎被罰兩萬，再經過埋呢鋪教訓，佢復出之後，短期內唔應該會重覆犯錯啩！？