馬主論戰

港陌

黃金褭蹄強配交代

　　今日重頭戲之一馬會短途錦標，姚廐「蓮華生輝」在陣，繼續由柏寶操刀，睇唔出有邊匹馬係佢對手，應該可以順利捧盃。

　　既然姚廐有惡馬在陣，估計會有馬配合出擊，睇好第五場「黃金褭蹄」，季內跑三仗都輸唔遠，已經試準晒走勢，今次搵嚟柏寶操刀，點睇都唔係陪跑格局，同場對手實力唔係好強，隨時可以響度贏馬交代。

張敬山

喜勝威先拔頭籌

　　方嘉柏今日手馬幾惡，我睇好佢有馬贏。先推介頭場「喜勝威」，加眼罩後連續兩場跑第五，上仗跑谷草一哩，轉彎走大外叠，返嚟只係輸畀頭馬「財富之星」一個馬位，已經試準晒走勢，轉跑田草1400米隨時可出頭。另外鍾意第七場「自由好」，上場輕鬆捧走沙田錦標，今次繼續面對相若對手，唔見得會有任何阻力。

寇鴻萍、梁廷鏘

人人興旺吼得過

　　剛啱葉楚航憑「創出傳奇」同「可愛人生」起孖，手風轉順，睇好今日呢個馬房繼續有馬贏。鍾意第三場「人人興旺」，上仗季內初出狀態未足，居然可以追近「讚惑」上名，實力的確唔簡單，今場對手弱得多，可以坐正。另外推介第四場「爆發力」，上場以短頭位輸畀「金威神童」有啲唔抵，今次柏寶再騎可補中。

任達華