高清睇跑馬：智多飛難尋對手

四哥

　　「飛騰」上季已由潘頓主操，今季三戰繼續由他操刀，首戰在泥地1200米跑第四輸得遠，但該役頭馬「八發八中」騎盡大勝，以遠距離見負亦情有可原。翌仗再跑同程大失水準，全因閘前扭計，情緒不夠集中。

飛騰跑1400米掂

　　上仗「飛騰」在總場次144出爭泥地一哩，終於首次入位。該役此駒沿途守在第四位，到直路二百米左右，鞍上人潘頓跌鞭，雖然騎者仍以手代鞭，但始終未能令馬匹以強勢衝刺，拉士更有點外閃，結果被「馬有成」越過失去Q腳，僅跑第三而回。不過，該役頭馬「威馬加鞭」貼內欄長驅直進，反而「飛騰」意外多多仍衝入季軍，反映目前評分具優勢，質新馬冇可能只識跑泥地，今次轉爭田草1400米，對手似是而非，係時候打開勝門。

　　另外，「智多飛」今季首仗加眼罩上陣，即在田草1600米殺入季軍，頭二馬「名人」、「神州八號」之後繼續有好表現，反映賽事水準甚高。

　　前仗「智多勝」再跑田草1600米大敗而回，主要原因是在閘內扭計，並以後足豎立，因而失地甚多，馬偉昌更因頭部撞到閘廂感到不適而退下火線。到總場次153，「智多勝」初跑1800米突然採取主動跑法，早段走二叠跟在放頭的「幻想家」外側，入直路後加速反應一絕，大勝「萬子千紅」五個多身位，後駒剛戰已在谷草長途賽贏馬，可見賽績硬淨。今戰「智多飛」縮回1600米一樣啱發揮，續跑四班賽對手難尋。

Sam