洪禮賢講馬：柏寶犯規情有可原

魑魅魍魉

　　柏寶啱啱夜賽闖禍，喺鞍上郁手推向內田博幸，令對方在馬背上失平衡，好在冇落樓，如果唔係，點止8日咁少，講得嚴重啲，整條蓄意傷害他人身體嘅罪名都仲得（香港法例第212章第17條，即傷人17）！雖然柏寶冇戒急用忍，於理不合，但其實情有可原，尤其喺比賽期間，你搏命時我搏命，唔關有冇EQ或機警問題。命仔攸關，因內田博幸坐騎「愛睦善」兩度外斜，好明顯影響到「蓋世子牙」，仲攞埋原本唔屬於佢嗰條跑線，假如你係柏寶，點知對方會唔會有第3次撞擊，如果有，而呢一擊先係最甘，落樓嗰個可能係自己，要保命，當時可能只得兩個方法，1個係柏寶已經做咗嗰隻，另外，就係停止催策，買你怕！而柏寶嘅選擇，係就係干犯賽例，卻保持高度競爭力，保障及對得住投X人，錯唔晒，兼好值得同情。

飛闖今戰見真章

　　國際賽外6場本地賽，場場中上班次，其中喺第九場，初步鍾意「飛闖」。初出一役係有點失望，但唔覺係升班帶來嘅壓力，事後檢討番，賽前或埋下兩條敗北伏線：第一，賽前喺9月頭曾缺課超過1周；其二，或因前述原因令進度趕不上，落場跑比較躁，前中段唔易留，喺馬林異常唔自在，不過，拉士騎者「淡淡定」跑到第五名，又唔算跑得差囉！總之，跑完1場工夫正常，工種仲可以加壓，又有埋內檔，切合其最好跑法，成績應比上賽有進步。