借題發揮：國際賽摩東舞台 加州萬里奉旨攞威

魑魅魍魉

　　4場國際賽盛事，舉世矚目，作為本地練馬師，有咩好得過喺呢個大舞台威威，就算4場大賽贏唔到，其他場次贏得到亦唔錯，雖然喺國際賽日，本地賽事嘅獎金唔會比平時高，三班係85萬，就係85萬，今日三班獎金唔會無端端多幾皮出嚟，但練馬師要威，馬主都係一樣，大賽日愛駒獲勝，最好不過，因為多外賓，場內氣氛又係最熱鬧嘅1日，榮耀之至。

　　可能大摩同Tony，深明此道，所以國際賽日經常有馬贏，近年好少見佢哋會喺呢日空手而回。如果論聲勢，今日大摩好叠馬，15駒Show晒出嚟，有4場出多過1隻，你話如果今日冇馬贏，難聽啲講句，山崩都有之！佢喺大賽嗰4場，有冇運行，一雪上季「四大皆空」之恥，真係謀事在人，成事在天，但其他場次好有兵力則冇花假。

　　就好似「皇帝旨令」，今季跑4場贏3場，贏嗰3場冇一次有對手可以威脅，都係輕輕鬆鬆贏個幾身位返嚟，嚟到呢個評分，係咪冇得再上，我又覺得未必。

　　而告東尼馬房，整體兵力係冇大摩咁強，但又未至於完全捱打，尾場「加州萬里」已經係其中1匹，贏完兩場後斷纜，輸在直路冇位上，今場增程至1600米，呢程喺外地跑到滾瓜爛熟，應該有好冇壞，或可施回馬槍。　

Jack