洪禮賢講馬：創出傳奇 篤定連捷

猪拉多纳

　　今晚谷草C欄C+3彎賽事，內檔馬有絕對優勢，睇番對上3期嗰26頭馬，佔半數係1至4檔勝出，趨勢如何冇得拗。騎師方面，冇咗柏寶、白德民，而韋達出馬又唔係多，成個格局似會吹冷風。

重心場次：第3場 第五班（40-10分） 1200米

　　「團隊福星」屬少數吳廐演出咁準嘅馬，跑3場冇Ｗ有Ｑ，尤其係贏完冇話唔見影就更難得。今次儲夠體力，賽前又冇疏操，唔見得係Hea格。而睇佢最後試跑，走過有力兼情緒安穩，論態係幾好，跑出水準，唔難再Ｗ。

　　「友情友義」四班長期抽外檔，可以一再唔輸遠，其實幾難，而落班喺今場執到內檔，算係有運，若一如預期，早段唔快，畀佢咬到好位，直路唔易過番佢。

　　「厲行星」性情焦慮，行沙圈成日見急，但上場亮相又係咁款，仲出唔到閘，拉士一樣追入Ｐ，賽績具跟進價值。

　　「金大人」冇回落，朝早仲係好好火。「小鬥士」冇欄冇命。「瀟洒威龍」上場直路塞死，惟今場外檔難克服。

　　「大地神駒」怕瘦，相隔個幾月至上陣，而期間工夫連貫，如交到前仗表現，好有威脅。「齊齊掂」跑得好都係爭三至五名。

第1場 第五班（40-0分） 1650米

　　「創出傳奇」拍跳課課靚，贏完好似仲銳咗，只要唔係負重能力普通，篤定再捷。「常山鎮寶」五班有級數，又係操到夠至再跑，有晒誠意。

　　「喜相逢」最好就係谷草一哩，重返此程實際。「驕陽飛駒」經常追到段，但最多亦只Ｐ望。「三陽盛泰」和「千笑」略有分利，卻仍在摸索期。「盈駿寶」近試確係幾好勢，終於肯返此程，變身唔奇。「朝東之星」排5檔，希望騎者發揮不似上賽。

第2場 第四班（60-40分） 1650米

　　「傑出君子」上賽前人馬曾往谷草試閘，喺出彎一段開始畀，勁勢維持到尾，途中亦冇話轉彎論盡，經上場後匆出，唔用小何，有理由相信之前除定眼罩係為今場鋪路。

　　「偉龍」形勢比上賽好，再冇咁多馬鬥放，應可交番本身班內中堅水準。「大王者」及「日月暉華」處身四班有班利，但陣上取位及發揮要好慎重。「電子精英」未返到最佳水平。「我愛您」季內已多次失望，轉場及重戴配件，未知有多大幫助？！

第4場 第四班（60-40分） 1200米

　　「天賜福星」剛賽前說過有了兩場熱身，應已到位，結果在轉場、轉跑法情況下，返嚟僅僅輸，演出勝預期，除非年幼馬搏完散咗，若不，必可出頭。「大地王者」歸納在神經刀一族，跑得好可以劏晒。「生豪」嚴格嚟講，進度未到十足，仍在轉化中，當然，與初期過急又嫩，已有很大差異。

　　「飛躍之鋒」轉場及縮程係咪會好，要博！「百利旺」贏完加至131磅，點都有阻礙。「卡加小子」好大機會畀外檔拖垮。「質超駒」和「幸運傳奇」分數有利，肯改戰此程，應是郁手之時。

第5場 第四班（60-40分） 1800米

　　「勁好友」賽前缺課，又係季內初出，仍可在此程爆冷，頭馬得來不易，照道理，只加5分唔會走樣。「萬子千紅」及「好運得福」，前駒多耗力及累積加分唔少，賽績準也只宜作腳，後駒剛呈上升勢頭，預期今場仲叻。

　　「心路」和「壽比南山」唔鍾意剛仗蝕章跑法，換人而轉程，有晒變身引子。「愛蓮說」早段冇馬鬥，加程仲好放。「精密紡」谷草性能冇問題，鎖定跑1800米亦係目前最啱方向。

第6場 第三班（85-60分） 1000米

　　「加州滿意」唔擔心跑短200米，尤其係狀態經過上場後更實淨。「常山鳳寶」明顯唔夠上季尾咁銳，1檔則會幫到，放得出，可爭Ｐ。「軍刀」4檔二叠仍會蝕得起，係驚有馬拍住燒。

　　「橫掃千軍」縮程、轉場、12檔及加罩，太多變數。「六六精英」縮落1000米，或會更好衝。「太極至尊」5檔有可能3叠，未必應付到。「勝在分秒」始終係腳傷退出過，有陰影。

第7場 第三班（80-60分） 1650米

　　「玩具神話」進度以今次嚟得最好，試跑有番晒火力，就算三班係下風，輕磅及檔好，可拉近與對手實力差距，值博。「勝任有餘」1800米撞板非練者所願，修正部署返強項，要畀機會。

　　「歐洲駿馬」初出1200米明短，追到入獎金名次，難度好高，復課有做嘢，用得韋達而加程，安排似樣。「威力高」三班阻力向來大，恃勇爭Ｐ。「飛躍王子」、「福到多多」及「一路順風」冇冠軍相，卻唔排除上到名。

第8場 第三班（80-60分） 1200米

　　「如願以償」剛勝辛苦，可能係要加程的啟示，今場未必有番上場競爭力。「滙名燈」減輕幾磅，對此匹路程專家有一定幫助。

　　「幸運愛駒」排4檔，演繹會比上場自如，威力料更強。「金津好」新勝，但往績冇打叠贏。「勝利就手」上場發揮及攞位唔係好，一樣追得勁，虛分唔少。