高清睇跑馬：森淼盛未見底

猪拉多纳

　　「森淼盛」自上季總場次406勝後，連仗表現差勁，莫講上名，幾乎次次捱打，最叻一次跑第九，好彩到了今季同馬房一樣有表現起色，五戰四次殺入頭四名，最近兩仗更拼入三甲，睇番這兩役走勢，前仗出戰1200當然嫌短，所以早段跟唔住係意料中事，同時係最遲入直路之馬，或許鞍上人賴維銘都打定輸數，索性唔走外檔拉入內檔衝，而又幸運地無遮無擋，內檔馬逐匹逐匹向外移出，得以長驅直進殺入季軍。

　　入位一役或可說是幸運之神眷戀，不過，上仗季內總場次259，「森淼盛」跳上1600米又一次上名，此役再不是走內檔，入直路拉出最外檔蝕位唔少，再睇早段遠遠落後，不斷推騎才勉強跟上馬群，到轉彎中段又要推騎，如此情況下獲亞軍實在唔簡單，雖不敵「極速寶寶」，卻再次證明目前評分未盡。

駿盈鬥心返晒嚟

　　「駿盈」今季表現唔差，首戰總場次77已有不俗走勢，該仗跑谷草1200米，十二檔起步形勢被動惟有留後，難得落後極多，且步速不算快，直路仍追回不少失地，跑第七輸四個多身位。接戰跑其唯一勝途田草1200米，排一檔躋身前列不感意外，吸引之處是牠向來出閘唔快，該役起步卻應聲彈出，更跑來有頭有尾，力拼僅負半馬位跑第二，並殺退再出再上名的「森淼盛」，上仗四十分馬唔跑五班賽，又要跑番谷草擺明食指未動，意外地繼續跑近，仲要閘前曾重新釘甲，多少影響其情緒下仍有好表現，久沉馬鬥心確已全面回復，元旦日回師田草勝途，值得睇好。　

Sam