洪禮賢講馬：凱旋昇輝 換人出擊

港陌

　　第九場三班1600米草地。「印度光輝」上賽前操練進程曾有唔妥，8月中開始做嘢冇耐，操至9月中停咗半個月，之後縱有3個月時間重新準備，但工夫斷過就係斷過，有冇令進度趕唔上，以佢賽前兩大閘走勢，結合埋初出嘅名次，唔覺完全冇影響。但話分兩頭，上賽際遇唔係好，沿途畀對手頂出三四叠，返到直路仲有兩腳，喼住湧上嚟，最終輸唔到4個身位，算係唔失禮，睇嚟喺三班嘅處境，仍然好似上季一樣係尖子。如果今場喺沿途攞位上唔差過剛賽，而佢亦已經熱咗身，話唔定可效法去季，又喺第二回合贏馬。

　　第十場二班1400米草地。「凱旋昇輝」嚟到香港一直喺短途打滾，冇1場輸得遠，但上名2次啫，二班要睇人面色咩？又唔能夠成立，因第2仗幾乎殺低新近在三級賽埋Q嘅「小橋流水」及「共創未來」，最大可能遲遲未勝嘅元兇，唯有賴落路程之上。呢次向中程進軍，1400米喺外地跑慣又一再上名，仲要係3歲嘅事，加程問題不大，亦可能令佢能力增強；昨日此馬最後試跑，走起上嚟，除咗隻馬夠銳夠力以外，感覺上人馬溝通唔錯，在操練前、後，甚至過程中，喺杜利萊手上試嚟聽話、順滑，完全唔似未夾過，睇嚟呢對配搭有可能初次合作就有火花。只要加程真係好，以佢嘅級數，唔難贏到。