高清睇跑馬：加州財子無敗理

猪拉多纳

　　「加州財子」一出即勝直路賽，最誇張是雖然出閘脫腳，但蔡明紹仍不慌不忙後上睇住來食，盡顯超班質素；上仗於總場次263再跑勝途，出閘麻麻早段稍為落後，但走至中段已輕鬆跟上前列，之後一望空即交出超強後勁，早知穩操勝券之下，蔡明紹亦按韁贏馬。再睇牠跑出56秒7，比首仗贏馬時快了六線，而兩場頭馬更累積加了28分，便知評磅員亦視牠為馬王級分子看待，續跑三班面對弱手，路合馬勇真係想輸都難。

　　「醒目精英」頭兩戰都做阿二，尤其前仗初跑1400米，路程方面已有阻力，尚要排十四檔，但最吸引是該戰強手林立，頭馬「好得意」升班連捷，四至六名的「黃金裹蹄」、「精奇」及「奔騰飛駒」再出非勝則位，可見跑第二的「醒目精英」已交出極高水準。上仗牠又排十四檔跑同程，臨場一樣被熱捧，怎料陣中腳踏鬆脫，以致白德民失去平衡，不要話推騎，甚至坐穩都有問題，結果全程未能推騎之下大熱倒灶，但居然敗不脫節跑第八，已確認馬匹質素極高，今戰強勢捲土重來應難尋敵手，有運地排埋五檔起步，篤定可大勝。

Sam