洪禮賢講馬：多利皇有質抵博

猪拉多纳

　　柏寶漫長停賽期完畢，復出首日好幾件都揀得上手。至於韋達及白德民，坐騎可能更犀利，尤其係後者，如果今日成績唔好，又跌爛好多眼鏡。亦因為白德民勢強，即代表大摩馬房呢期或有大手交易。

重心場次　第9場　第三班（80-60分）1400米草地

　　「傾力之城」只要腳冇事，操得跑得，二班都夠贏。上場沿途蝕得多，仲可以與3W馬「好得意」埋Q，犀利。今仗8檔，如際遇唔差得過上場，贏得。

　　「如願以償」增程係面對現實部署，性能漸漸傾向均速兼遲撻着，唔轉中程，幾難有突破。「爪皇豪火」初出1400米有難度（外地都係跑開1200 米），直路仲要轉過兩次位衝，一樣後追有勢，確認有分在手，預期有過經驗及熱身之後，可會更牛。「按一按」以今季兩場輸近賽事水準放在此場，唔難有三甲。「八逢九紫」剛仗大致跑盡，加上向來唔利打叠，機會較次。「化工之昇」又係少有兩劑，但如撞啱步速慢，或有P。

第1場　第五班（40-10分）1200米 泥地

　　「金巴利來」兩仗前初跑同程，沿路外叠返嚟仍有殿軍，當時仲未加眼罩，反映場地性能唔會差。而上場見識到配件成效，目前能力已升級，有權再W。

　　「揀得準」上場信心大得多，轉場點都有多少擔心，作配。「勁辣椒」唔使介意往績，落到五班唔同環境，剛敗則輸在早段用力多咗，但顯示到本身速度唔係同班馬可比，如肯盡放，或可帶到。「瀟洒靚龍」技止於此，要賺形勢才可入圍。「勁駿」位好易擺前走，惜今季賽事中演出老退。「勵盈」有班，此程曾上名，如場地有得追，有權爆。

第2場　第四班（60-40分）1200米 泥地

　　「飲水思源」近兩仗同程成績迥異，最大原因係取位問題，上場入P證明路短亦ok，希望此場多馬放，直路鬥爆，佢就春天嘞！「極速之星」及「風陵渡」，四班有牙力，排內檔幫到手，有P望。

　　「乘奔御風」同系馬唔少搏完喼住好，希望佢唔係例外。「童夢」2檔好啱放，如計贏馬時間，負114磅升班跑，冇有怕。「天賜福星」泥地得唔得，要博！？「寶貝」唔只1場失望，除非小何7磅有神奇作用，若不，目前分數要再「質」低啲才可反彈。「健康田園」肯轉泥地，已要留意走勢。

第3場　第三班（80-60分）1000米 草地

　　「加州財子」1場贏得易過1場，陣上仲明顯乖咗（出閘冇咁慢、途中少片咗），只要唔係負重唔掂，邊有對手。「輕輕鬆鬆」見晒底，速度係咁多，睇吓放到邊度畀人過。「駔驍駿駒」長期跑二至六名，可拖。「步步闖」賽前兩大閘皆見出閘有唔妥，口勁亦嫌重，憑質出拼。「尚駿心」上場已感失望。「活力駿駒」大閘試得唔差，係擔心大大件要熱身。「日日中」近試好行，跑咗兩場漸有水準。

第4場　第四班（60-40分）1600米 草地

　　「新希望」朝早見淡定，落場唔知會唔會文靜，但有質是必然，希望跑到第三回合，唔似之前咁green。「浦東之威」及「傑出君子」，1隻贏完縮程，另1隻路程冇乜根據，可爭不穩。

　　「京城三寶」初上1600米跑得唔錯，傾向步步靠檻之馬，加罩如放得順，應比上場更叻。「中國好」又增程，唔知取向！？「天之驕子」一直有唔錯狀態，只係成日冇表現。「好精伶」以前一對前腳出得唔靚，但愈見改善。「極速寶寶」要考驗了。

第5場　第四班（65-40分）1400米 草地

　　「中國神農」前仗賽前有好感，該役谷草1200米末段衝得幾好，落班肯轉程及換人，值得一敲。「豐衣足食」單試及拍跳都靚，此程又打叠上名，正路之選。

　　「天外之天」剛敗因路長，但即縮400米，有懷疑。「氣定神閒」正宗1400米材料，但要有步速而佢留得順，才會跑得好。「卡加大師」今場冇馬放，3檔如畀佢擺到前走，或賺晒形勢。「上海先鋒」與「搖滾雄豐」，邊線對象。

第6場　第四班（60-40分）1400米 草地

　　一對質新馬單挑，「醒目精英」及「多利皇」，大家都有質，由於賠率太懸殊，決以後駒行頭。「快利多」有番好位，如跑回前仗水準，1檔預咗賺。

　　「夢想家」上場入Q或是受惠當日利放模式，要再證明自己。「新三刀王」試跑比上賽前有氣勢。「漸信良駒」再加磅及排外檔，點都有影響。「雙辣」有班，但1400米唔係射程。

第7場　一級賽　1000米 草地

　　「蓮華生輝」對番本地馬，就算冇昔日咁強，一樣夠照。「同一世界」國際賽無故大漏閘，輸到完全唔似佢，但計能力，今場係第二把交椅。

　　「點心」直路賽往績唔好，但連續兩場1200米放到埋門仍然好韌，未必係副車。「金德寶」起碼賽前跳過1課，但嗰課草地又扭計，仲喺早段鬧情緒，呢匹「港女」捧唔捧場，真係要睇到最後一分鐘。「綠色駿威」睇落係未回夠氣。

第8場　第三班（80-60分）1650米 泥地

　　「勁快」遇到1場水準較次場合，早段會快嗰幾駒又排晒佢外側，形勢好啱發揮。「善戰」唔落班，特登揀今場，實在大前仗同程唔係畀人撞，可能贏咗，惜演出飄忽。

　　「金獅猛將」14檔，要睇昌哥點處理。「勁飛馳」重磅唔易捱。「確威星」增程應會好。「穿針引線」自從放得過快嗰場之後，真係未好過。「一路順風」與「神州八號」，買T可留意。

第10場　第二班（100-80分）1600米 草地

　　「一言為定」試大閘贏得靚，掃走之前耐冇操嘅疑慮，佢演出太準，膽材。「何方神聖」與「人人興旺」，剛仗幾乎齊到，宜一併兼顧。

　　「寶利多」試跑冇問題，係擔心攰咗。「軍旗」回到草地及加程，處理正確。「騰雲駕霧」重磅不怕，只擔心外檔令早段多耗力。「漂亮第一」單睇埋門試跑，其實幾企理。「正毅」係咪冇兩劑，好難講，睇佢上場咁蝕湧得勁則犀利。「豪情拍檔」對手唔同晒。