高清睇跑馬：太極至尊檔佳贏

猪拉多纳

　　「文武維揚」今季復出首仗，於谷草1000米排十二檔跑第二，試準場地性能後再出即在同程輕鬆補中；接戰首度跑三班賽一樣照贏，亞軍「勁勇士」再出即贏，其餘前列馬如「滙名燈」、「大把在手」及「常山鳳寶」之後全有好表現，可見此駒本錢雄厚。

　　上仗「文武維揚」未能於總場次235的谷草1200米再捷，除排十二檔及初跑此程外，陣中亦曾受擠迫，過了二百米方能望空下，結果追回一席第二。再睇頭馬「金津好」之後多取WQ各一，證明賽事水準高得緊要，操足而來篤定補中。

　　「太極至尊」上季跑至第二仗已開齋，擊敗之後四捷的「勁勇士」，質素之高毋庸置疑；今季「太極至尊」體重升逾千一磅，首戰即於田草1000米殺入亞軍，奇怪接戰卻突然加眼罩，結果於谷草1200米跑梗頸四。之後三戰繼續戴眼罩並得一冠兩季，最威水是泥地又得谷草又得，甚至上仗在總場次254跑谷草1000米，慢閘後被迫留前鬥後，並非其最佳跑法，但最終仍追入第三，今戰負輕磅兼排二檔有利搶放，穩膽。

Sam