洪禮賢講馬：極品絲綢谷中長勝

猪拉多纳

　　今夜谷草C欄賽事，唔見得冇得追，短途如是，長途一樣。至於檔位方面，之前兩期C 欄為例，9檔及以外嘅頭馬，佔總數接近一半，如果今期唔係忽然轉向，內檔而跑法主動嘅馬，其實唔使睇得咁高。

重心場次：第7場　第一班（90分或以上）1800米

　　「極品絲綢」谷草未輸過，級數在呢場幾乎高晒，秤落好惡，有埋之前泥閘肯追嘅表現，更加安心。

　　「衝鋒槍」最近一課泥閘名次普通，直路唔係抽到實， 一定撲到上嚟， 睇馬唔係冇「方」，本身谷草能力值同樣勁，有權串馬房Q。「威利旺旺」近況幾好，從最近贏泥閘已表現到出嚟，只係季內賽績較差，信心難講。

　　「火龍駒」近試明顯冇之前咁躁，收斂後預期能力可復現。「好先生」卡士冇對手可及，試埋谷草至轉場，有晒誠意。「怡勝」及「迎風起舞」礙於級數有所不如，最多爭三三四四。

第1場　第五班（40-0分）1200米

　　「神力金剛」上場跑到中途呼吸異常，起碼知點解會輸。復課經常拍跳見靚，唔覺冇態，希望轉場及換人，會有番前仗追勁。「齊鼓掌」揀得1次，唔爭在再揀多次，尤其上場綁脷後見功效。

　　「齊齊掂」1200米本來冇1000米咁好把握，有1檔則幫幾多。「馬中神駒」上場輸近唔排除係對手水皮所致，尚幸有好位，易攞着數，當然，必先要佢唔好又漏閘！「大地神駒」谷草其實唔係好啱，除非早段步速快。「團隊福星」外檔不易克服。「真如寶」最近1課拍跳好好勢，呢匹三零部隊，有賠率要考慮。

第2場　第四班（60-40分）1200米

　　「勁力」試咗3個大閘，喺最近谷閘明顯比之前有進步，除咗起步反應，連帶中段嘅速度感，以及末段貫注力，一一強化晒，3歲仔經數月打磨，已操到夠水準，初出得與否，則要睇質素。

　　「幸運傳奇」及「卡加小子」，一對馬剛於同程上名，正路配腳。「日月暉華」唔使排劣檔，發揮上應會較靈活，能力亦可能增強。「萬事綵」實力在四班中下級，要有形勢才會有作為。「萬人迷」轉回草地充其量三至五名。「齊勝」上場出閘被夾係有影響，惟慳慳埋埋嘅第四，又唔好睇得咁高。「好笑容」今次冇咗1檔，未必有本錢。

第3場　第三班（80-60分）1200米

　　「文武維揚」在進步中，試跑「行」得嚟，冇以前咁躁，轉到款會演化成力量，呢次排檔冇咁差，贏得。

　　「至尊飛飛」按上場冇檔位形勢，拉士仍有得湧吓，多少也增值了。「威威多星」加配件令主動性增強，陣上有冇實際作用就兩睇。「寶成智星」多馬搶唔易應付。「超勝」勤力馬，朝早貫徹本色，有態而輸級數，但久唔久休出會好，冷腳。「一路奇兵」等加程；「團隊精神」等降班。「浚鋒天河」眼罩戴戴除除成日刺激到，小心。

第4場　第四班（60-40分）1800米

　　「好運得福」及「十足十」，一對馬上場皆喜歡，前駒新勝之後，唔係冇做嘢，用小梁實際比上場輕咗，計數唔蝕。後駒有加程本錢，加上只係跑到第3仗，贏晒體力。

　　「橫亨」剛仗已有揀，指出今季喺走規及脾氣方面有幾大改善，上賽前唔係傷過腳，其實會嚟行頭，總之，上場已見好，再追。「俊威威」、「金瑞」及「精密紡」，信心講唔上，但根據近績，唔係冇上名資格。

第5場　第三班（80-60分）1000米

　　「常山鳳寶」3檔起步，埋便兩駒未必夠佢快，或與1檔無異，帶得出，可能放到。「馬之王」經常冇運，但三班值中上級，跑短200米其實唔會有影響。

　　「太極至尊」只擔心出閘會慢，如果唔係，三甲幾穩。「太陽昇」與「永同至尊」，能力在此場難贏，或有P望。「威威財星」累積加分唔少，8檔亦唔易克服。「勝在分秒」受腳患拖累，今季狀態難跑起。

第6場　第三班（80-60分）1650米

　　「朝東飛駒」近期操練手法，似衝着今場而來。由於好位關係，而預期步速快極有個譜，1檔起步可能賺足全程。「傳奇快車」如遇唔番上場超快步速，威力或打折。

　　「紅跑車」回到三班谷草會好惡。「福喜」終於唔係排衰位，唔使「外遊」，能力或完全唔同晒。「歐洲駿馬」及「雪山神駒」，三班要睇形勢，邊線馬。

　　「紅日」喼得到勇態，又係上場揀過嘅馬，再跟。「太平星」大閘稍欠銳勢。

第8場　第二班（100-80分）1200米

　　「錢照贏」及「萬里駒」，分別排2、1檔，如果唔係出現鬥燒，好大機會一Q返。

　　「賀喜」以為上場無法再進，跑落卻比前仗仲勁，證明現時好當弗。「金獅名將」數唔清上場初出究竟阻咗幾多次，淨係知道拉士衝得好勁，睇嚟插二班好濕碎。「讚賞」及「超群如意」，外檔有顧慮。「戰河」試跑長期有兩腳，大冷腳。「開心動力」如跑得番季初贏馬水準，有權掃晒。