洪禮賢講馬：伽羅轉場搏殺

港陌

　　第九場三班1400米。撇開「伽羅」有痰嗰場跑得唔好，其實餘下5場，向來演出準，田草中短途，定係谷草一哩，統統唔成問題，性格忠誠可能係主因，但能力在班內略為超級亦係要素。

　　終於唔再勉強跑谷草，對發揮有好大幫助，始終佢跑法被動，經常出彎要抄出外叠衝刺，邊會蝕得起，叠埋心水返回勝途田草1400米，嚟得更實際。只要重磅唔會影響太大，唔係冇步贏面。

　　第十場二班1200米。「超群如意」去季尾腳傷提早收咧，腳傷陰影可能在暑後仍困擾緊佢，如果唔係，唔使拉過去放草，又一再放慢過操練工序。但上場初出卻出奇地跑得好，明明賽前亮相時見佢冇乜色，身型又未收好（馬匹體重亦超標廿幾三十磅），居然沿路蝕住跑一樣有第四名，究竟係強大新鮮感作祟？還是質地搭夠？好難一概而論，最重要反而係跑完唔使就住操，以及出賽頻率亦正常。

　　至於能力方面，唔計今季休出一役，上季可在三班長期成為前列常客，推算負118磅在二班，就算跑田草亦唔使忍氣吞聲。由於白德民超磅一樣肯騎，絕對係誠意之作，因季內騎者該負磅範圍坐騎上名率好高（118至120磅有14駒，得3冠2亞3季3殿）。雖然要「超群如意」征服二班或有難度，P望成數則幾高。