楝悉先機：肥仔糖夠斤両

猪拉多纳

　　眨眼又到農曆新年，中國人講意頭，頭彩固然重要，尾彩亦一樣，對於今期送虎迎兔嘅賽日，大家共勉之！刮番筆橫財過肥年，到時手鬆啲，派利是大封啲，個個笑口常開。禮多人不怪，阿棟喺度預早向各位老友拜個年，祝願人人健康、財源滾滾、出入平安。

　　第一場第四班1000米。「星運俊爵」上場臨時易配，鄭雨滇真正冷手執個煎堆，13倍冷W就咁爆出嚟，睇姿態贏得輕鬆，而跑法上覺得比前仗進取，出來效果又幾好，可能試到目前最佳跑法。今仗轉回愛將巫斯義胯下，並跑贏馬路程，在公在私，巫斯義必施盡渾身解數。

上場輸運氣

　　第七場第三班1200米。「肥仔糖」上到三班跑兩場，分獲亞殿，上場衝到最後一步影相輸，其實已經係運氣成分主宰了。另一方面，卻睇到佢喺三班好有斤両，唔係等閒同輩可以相比。只要今場14檔影響唔係好大，要補中唔會有太大難度。

　　第八場一級賽1600米。哪怕今場大摩3駒出戰，我繼續信隻「魔法幻影」，阿棟一路跟進佢，近三兩仗都冇令我失望過，尤其上場國際賽，輸畀過江龍「飛雪仙蹤」，其實入Q已當贏。今場跑番本地賽，對手級數已唔同，平磅跑，點會冇着數。同時，此駒1600米及2000米幾拿手，要衝擊三冠系列賽，唔到大摩唔肉緊，所以，佢應該係主力所在。

點買法

　　年尾流流，等錢過年，買馬手鬆定手緊，人人唔同，由於阿棟係玩樂性質， 一向唔建議錢博錢。呢期會小注捧「魔法幻影」WP。至於心水連贏場次，偏好第七場，勝在該場形勢明朗化，「肥仔糖」之外，可再揀得上手之馬唔多，不離2、8 、12 及13 。


陳華棟
資深評馬人