洪禮賢講馬：帝豪名駒有景轟

魑魅魍魉

　　第六場三班1650米。「帝豪名駒」今季跑咗超過10場，贏1W，但自從贏完之後，暫時仍未搵到第2W，係加磅後形成壓力？路程未完全配合？可能兩項因素各佔一半，始終唔認為佢係短途馬，贏谷草1200米嗰場，或是級數搭夠，所以，之後喺短途跑嚟跑去都再冇突破。實在，季初已連跑兩場一哩，放頭又近過，後追又近過，路程性能唔使疑慮，呢次忽然唔用徒弟，仲忽然轉程，好似有景轟。

　　唔排除係自己諗多咗，隻馬根本已評分盡，依家只係抱住hea嘅心態嚟跑，有賽程就報，出賽為減分。但總係未忘前仗跑錯晒仍輸得唔遠賽績，因該役處理手法睇完嚇親，唔信係真（前中段三叠蝕，拉士卻在內欄塞車），至少證明此際唔係冇狀態。另外，今場整體賽事水準，只值班內中下級，以佢嘅能力值，要入三甲，唔係好難。

　　第七場三班1000米。「常山鳳寶」上場幾乎贏埋，近3仗已累積1W2Q，但調番轉頭諗，已經用咗唔少力，分數亦唔係冇加過，同埋，上場喺佢後面嘅第三四名，再出一一冇P，所以，佢有冇本事喼到成績，真係兩睇。慶幸今仗路程啱兼排好位，而埋便兩駒應該唔夠佢快，其實與1檔無異，只要有番應有嘅速度，好大機會放到返嚟。