洪禮賢講馬：富貴金龍 升班照捧

猪拉多纳

　　第九場一班1200米。「富貴金龍」今季跑咗6場，贏咗一半，輸嗰3場當中，有1場係輸鼻位跑第二名，有1場因嚴重外閃，仲有1場係縮程至直路賽。整體賽績幾乎準過晒同場對手，推算以呢分成績表上嚟一班跑，唔應該會即刻變鵪鶉。當然，如果單計佢贏馬時間，喺度未必夠贏，尤其上場締速更唔突出。要知道，剛勝姿態其實好「依絲」，感覺上，「手風順」一度拍上嚟，實際去到終點，後駒已被愈拋愈甩。同埋，睇番當日10場頭馬，有8W締速比標準時間慢，所以，唔使太介意「富貴金龍」只跑出1分09.52秒。

　　如果要數同場對手，大摩一對「飛闖」及「讚惑」，最有威脅性，好在佢哋各有缺點，1隻外檔加重磅，另1隻已轉向中程，或要重新適應1200米，變相令到「富貴金龍」爭勝機會提高。

　　第十場三班1400米。「至勇飛龍」近仗冇邊場大敗，就算有時陣上跑錯、賽前工夫較Hea、檔位形勢唔好等等，一樣冇大影響，有可能佢評分未盡晒，以及狀態未回落。由於呢場落番三班跑，對佢嘅假設有冇錯，應該可以有眉目。

　　查番過去成績，佢跑咗6場三班1400米，得1場冇前四名（第五名），完全睇得到佢幾有Power。呢場用番德叔，評分去番季初贏馬時，而賽前工夫總算比近仗入肉，睇嚟唔似又做路人甲。

馬會賽馬節目主持　洪禮賢