借題發揮：苗禮德好興換「拍乸」 卓利熱潮要把握

猪拉多纳

　　苗禮德冇耐至贏完打吡，截至現時為止，佢擸咗28場頭馬，當然未係佢個人季度新高，呢個馬房開倉以來，冇試過大起大落，通常每季廿幾場貨仔，最多嗰一季去到34W。目前未到4月，已經有28場，睇走勢及運勢，今季好大機會可以刷新個人紀錄。

　　講開呢個倉，久唔久會同緊密合作開嘅騎師冷戰， 韋達又如何，雖然近日騎練捧走港澳盃，但年前亦曾冇交易，十屆冠軍唔會「免疫」。而馬偉昌季初儼如主帥，期期跑馬梗有三幾匹來自苗廐，但自從2月贏完「幸運來」，接近兩個月冇騎過嘞。而呢對組合暫時斷絕來往， 最受惠首推卓利，年頭開始慢慢步入　「熱戀期」，單睇3月苗廐5W，3 場由卓利建功，就知關係有幾緊密。

　　今晚苗廐出3駒，全部由卓利騎，「好運得福」、「科研精英」和「浪漫添馬」，坦白講，3匹馬已經唔係話有好多分喺手，季內亦先後贏過馬，總算交咗差，戰意如何，會唔會趁勢回一回等下季，呢點唔會完全否定，問題係隻隻路合又有好近績，難道全部玩隱形？

　　阿Jack對於「好運得福」和「科研精英」比較看好，因為「浪漫添馬」評分的確幾盡，仲要冇埋上場嘅檔位優勢，恐大大減低機會。而「好運得福」終於浪子回頭，唔再硬係跑大長途，肯返最首本谷草1800米， 應有拼意。至於「科研精英」，連贏兩場， 負磅係加咗唔少，卻銳不可當，再捷唔係冇可能。

Jack