高清睇跑馬：大地神駒後勁超強

魑魅魍魉

　　第二場「大地神駒」在上手馬房從未有表現，且跑到去年一月尾便提早唞暑，好彩加盟告廐後轉弱為強，不止耐操耐戰，而且今季首仗跑谷草1200米即殺入Q 腳，排劣檔亦後追上名，超強後勁已露一手。元旦日出戰田草1200米（總場次285）更是其代表作，再次採取上述跑法，就算途中數度受阻，致直路上極遲才望空，一樣後上如箭打開勝門。

　　前仗田草1200米又再建一功，韋達絕少贏後上馬，還要全程走外叠，仍能挫敗再出補中的「麗晶之星」。上仗韋達再騎雖無功而返，但絕非增程 1400米唔掂，事關步速超慢，留前鬥後已經吃虧，更弊的是直路被困，過了最後一百米才得以望空，且只能在在窄位衝刺，敗局已定韋達亦費事打鞭，就如沒有跑過一樣，保留體力周日再戰1400米，對手似是而非，放心再追。

　　第九場「勁飛寶」首兩戰都做阿二，同樣不敵「甜將」，第三仗避開後駒，形勢大好終於坐正，點知再出又面對「甜將」，結果再一次做二奶。好在「勁飛寶」拼罷大有進步，前仗（總場次468）第四次面對「甜將」，成功一雪前恥，且贏兩個多身位。撻着摩打後升勢持續，上仗增程跑1600米再下一城，至吸引是棄用前仗快放跑法，排九檔稍為留後，前段寧願走三叠冇遮檔，要知此場步速不快，擺前跑一定冇問題，發揮得不算好照贏已經精采，且沿途蝕位兼負頂磅。周日初爭二級賽同程，完全不成問題。

Sam