借題發揮：上次全泥宴中三元 攞分群英又出動 告東尼食過翻尋味

港陌

　　跑到今期已係本季第60次賽事，目前練馬師形勢仲係拉鋸戰，處於三四位嘅方嘉柏及蔡神仙，現時只得43及40場頭馬，唔係話冇本事迎頭趕上，但除非大摩同告東尼係紙板人，呢三兩期翹埋對手冇攻勢，如果唔係，依家拋開方蔡兩廐接近10W，莫講話要拉近距離，唔畀人拉開已經好叻。

有力趕過大摩

　　事實上，季中開始，大摩與告東尼成日互片，久唔久你起孖，下期就輪到我連中三元，現時佢兩個贏馬場數一樣有51場。由於今期後者感覺上有大攻勢，或者呢次全泥宴會係佢反先嘅一晚。再者，之前那期八場泥地賽，當晚東廐贏夠3場，有可能食過翻尋味，會對準呢期嚟部署。而望望佢手馬，有兩匹當晚頭馬「成就美麗」及「朝東精英」又一齊出，更彰顯今晚有手影。

　　其實除了一對泥賽W「成就美麗」和「朝東精英」之外，「綠駿群英」亦係新勝馬，呢匹馬喺轉倉第3仗交代到，贏得唔覺辛苦，睇落仍然有分在手，而練者唔等4月25日勝途田草1800米，安排佢轉泥一試，如果隻馬可應付呢條跑道，唔係冇本事再捷。

　　至於「成就美麗」及「朝東精英」，前駒上賽前曾經缺課，兼初跑田泥，仍可力壓對手勝出，的確唔簡單，而後駒取勝姿態也厲害，一條直路掃晒對手，強如「好好彩」一樣抵擋唔到佢後勁。總之，呢對馬上場贏馬具指標性，值得再追多場。

Jack