洪禮賢講馬:善戰爆冷金瑞熱倒 唔應該對號入座

猪拉多纳

　　世事往往好「翹」，好多嘢好似整定，係咪真係涉及人為，好睇用咩角度去睇成件事，如果未有先作分析，主觀膽拖自我中心去評估，肯定有偏差，久而久之，可能走火入魔。譬如近兩次跑泥地夜賽，柏寶連場孭鑊，仲要兩期都咁甘，冇馬贏已經好意外，仲要大熱門係咁瓜柴，3月23日兩匹大熱門「快馬當先」和「善戰」，尚且保到個P，但剛周中賽事，「樂融融」和「金瑞」，兩匹大熱門跑到冇前四名，的確具摧毀性。好在今季再冇全泥夜賽，如果唔係，捧場客唔知又會被扑多幾多棍！？

　　講開柏寶，之前由佢騎開嘅「善戰」，換人爆冷成功，咁啱嗰場佢匹「金瑞」大熱死火，坦白講，我唔認為有甚麼金蟬脫殼、聲東擊西之嫌，亦唔覺得當中有咩陰謀，熱倒冷爆云云。正如當晚做直播之時，已經帶出兩駒賠率嘅分野，1隻有十倍八倍獨贏，另1匹唔夠3個開，打句問句，站於菠菜角度，「善戰」點都買多次，除咗W賠率吸引之外，冇理由上場3倍有份輸，呢場半冷丟低我啩！？

　　今期賽事跑谷草日馬，唔知會爆成點？初步對於熱梗嘅「紅衣叻叻」較有好感，只因愈贏愈有格，就算未改好晒急口毛病，睇佢上場以今季同程第三快時間勝出，留喺三班跑，加嗰6磅，真係濕濕碎。