洪禮賢講馬：開心老友 後勁犀利

港陌

　　第九場一班1650米。「金獅威將」對上幾次喺賽前如試過大閘，落場跑親總有成績交出（近3仗跑得差，賽前並無安排大閘），而今賽前又有此安排（試閘贏得輕鬆），或是出擊先兆。其實以佢卡士轉到谷草，除非細場性能差到痺，如果唔係，重磅仍然讓得起對手。佢季初又係負131磅，喺田草1400米以頸位輸畀「藍天」，後駒贏完仲喺一班多添3P。之後「金獅威將」再喺級際賽打叠上名，雖然其中1場係讓磅賽，要知道喺佢前面過終點嘅馬係「步步穩」及「自由好」，所負距離遠啲又如何，起碼喺今場搵唔到咁嘅卡士對手。一旦此駒谷草性能過得去，已經有贏面。再講，韋達唔騎肯定會好分啲，既有級數又有賠率，點解唔博。

　　第十場三班1800米。「開心老友」連續幾場喺前幾名返嚟，到依家仍然未使升班住，雖然今場磅位係比前重咗好多（之前全在120磅以下），但對手又係同上賽差唔多，就算贏唔到，要跑到入P唔難。

　　「開心老友」前仗贏谷草一哩，及至上場贏1800米，締速唔算快（俱比標準時間慢），但上場初跑此程，取勝姿態的確犀利，約莫喺拉士100米，一拍上「喜蓮智星」，話過就過，兩駒都冇乜點鬥過，最後幾十米收韁都贏個幾身位。單以咁嘅姿態而言，尾場搵膽實會揀佢。

馬會賽馬節目主持　洪禮賢