高清睇跑馬：清脆利落冇對手

魑魅魍魉

　　「清脆利落」今季首度登場，但首兩戰即熱倒，初出跑泥地1200米一役氣管多血，接戰轉爭谷草1000米但扭計慢閘，落敗同樣跟實力無關。前仗於總場次 455增程至谷草1200米，出閘快可惜走至半程被對手頂出三叠，蝕位望空下入彎冇耐已發力，甚至趕過帶頭的「勁闖駒」，可惜用力太多難貫注到尾跑第二，但蹄下敗將「勁闖駒」之後兩仗得冠亞各一，可見「清脆利落」此席亞軍水準極高。

　　「清脆利落」上仗於總場次508再戰同程，當晚落雨場地明顯利內叠，結果「宇宙良駒」全程靚位贏馬，於外叠的「清脆利落」又一次飲恨做阿二；這匹四班超級馬今戰改跑條件賽難尋對手，續配何澤堯亦應有最佳發揮。

　　「紅衣叻叻」乃今季唯一曾三捷的蘇廐馬，而於總場次351的谷草1000米力挫「火燎腚」同「御鋒」更屬高水準賽事；上仗在總場次439同程再建一功，最跨張是跑出56秒88，此為今季三班同程的最快時間，足證牠大把在手；該場贏個多馬位不算多，但賽後仍被加八分，足見備受重視，依舊出戰三班可謂虎入羊群，唞夠而來體力正強，贏馬呼聲高唱入雲。

Sam