賠率有路捉：歡欣星唞夠有人撐

魑魅魍魉

　　今日谷草日賽，大家都會估爆冷，但噚日睇飛數，好多場都好正路，惟獨是第二場「歡欣星」W賠率有料到，如果有冷馬攪亂大局，佢好有機會係其中一隻。呢隻馬至今只係跑過三場，最叻得第七，所以前三仗個賠率都有番咁上下分頭，初出嗰場70倍已經係最熱啦，其後兩仗賣到99倍，但係今次開飛竟然得13倍，究竟係因為其他熱門唔吸引，定係佢真係嚟料呢？

　　噚日，大熱門一度落咗喺「御龍神駒」身上，佢初出排十二檔都衝入第四，今次強配韋達移番入一檔，有飛好正路，由呢點推論，「歡欣星」噚日開飛後幾個鐘都喼得住13倍，應該係出擊訊號先啱。咁佢有咩咁值得人撐呢？唔多唔少同佢同程跑第七嗰場有關，話說佢嗰次砌低之後六戰唔失前四名嘅「星運俊爵」，又贏咗上三班都入三甲的「進勝福星」，底質應該唔差，今次唞咗三個月先再出嚟跑，雖然月初隻腳出過小小事，但馬會獸醫畀得佢跑，即係好番晒，難得今次有飛，當然要捧WP。

何澤堯當弗可爭騎師王

　　騎師王方面，四位騎師嘅賠率明顯突咗出嚟，韋達柏寶兩大巨頭不在話下，蔡明紹同何澤堯拍得住佢哋，應該係因為師父夠堅。講到谷草，方嘉柏可信好多，何澤堯執住佢六隻馬，加上近期當弗，可以一捧。

周仲