洪禮賢講馬:續領風騷 擺明有分利

猪拉多纳

　　第十場三班1400米。「魔幻大師」隔咗4個月冇跑，之前仲兩度退出（因流鼻涕及氣管有痰），上賽前整套準備上，亦唔係冇甩漏過，故此，上仗去到最後50米先至畀對手任過，唔覺得係失威，或全是班次壓力造成。

　　如果貨比貨，今場對手略比上場強，淨係數數同場之中，季內曾勝三班賽嘅，已經畀上場嗰批為多。但要知道，畀「魔幻大師」有番1場實戰重新起莊，對進度會有幾大幫助？未必完全喺表面可以計得到。依個人睇法，3歲仔一跳程上1400米就贏，翌仗加至133磅再W，已經唔可以單純咁計只係四班頭馬。除非今仗7檔會亂跑或際遇好差，沿途外叠置前等瓜柴，如果轉一轉跑法，嘗試採用守好位，呢把刀可能更犀利。

　　第十一場二班1400米。大摩今季PP初出即跑得好例子唔多，反而次回合至有表現嘅佔多數，如像「包裝選擇」咁樣一出即勝，原來快手可贏3W，如果咁睇，「續領風騷」一出入Q，梗有把炮！

　　唔好淨係計上述嘅概念，佢上場與「傾力之城」的確係勁，雖然畀頭馬拋開個幾身位，人哋造出今季同程第五快時間，跑個第二名已經叻，仲要「續領風騷」出閘唔係好，末段又遲撻着，但拉士攞條Q嘅過程卻唔辛苦，冇番咁上下分喺手，真係唔相信。如果1場搏散咗就冇得好講，只要稍比初出進步，已可出頭。