棟悉先機：天瞳操弗省招牌

猪拉多纳

　　今日跑重要錦標，冠軍一哩賽港隊圍攻外賓，向來都係有咁嘅現象，今屆也不例外，好唔好賭係其次，觀賞價值肯定有。至於大賽日吼邊個騎師？我唔敢寫包單，不過，捧韋達就真係要三思，今日佢唔係冇好馬在手，贏得幾多W，三場？我買下唔買上！

　　第六場四班1400米。「自由萬歲」上場唔知咩事，輸到完全唔似佢，但計之前入P一役，水準真係唔講得笑，該役佢攞到第三名，跑贏「松林之星」及「文武精神」，呢對馬之後共交出3W，推算佢在四班都超幾多。轉薛達志馬房後工夫做得足，睇手法立心搏轉倉首仗，用埋硬功騎師杜利萊，呢匹唔易操控嘅馬，應該會乖乖聽話，一於捧場。

　　第十場三班1400米。「天瞳」又係另一轉薛廐初出之馬，又係大力做工夫，準備好晒，擺明想一出即攞威，省靚個招牌。嘩，睇佢季初贏咩馬先得㗎！係殺上二班贏埋嘅「寶利多」，目前佢分數又唔係特別偏高，真係諗唔明之前點解跑極唔得。當然，我唔排除對上1W係季初水平，但係龍係蛇，呢場應該會知道！

續領風騷落班冇對手

　　第十一場二班1400米。「續領風騷」初出入Q，輸畀廐侶「傾力之城」，可謂敗不足辱，頭馬造出超快時間，佢能夠輸得唔遠，已經係實力嘅表現。今仗降到二班跑，擺明着數，負磅又唔係重，區區多9磅，都係122磅咋！喺度邊搵到「傾力之城」之流，有望補中。

點買法
　　
　　薛達志兩匹轉倉馬之中，比較喜歡「自由萬歲」，而尾場摩廐「續領風騷」亦覺穩陣，呢條W過關，唔慳得。至於重心連贏，揀尾場，熱膽拖邊線腳，中到都唔會乏味。

資深評馬人　陳華棟