洪禮賢講馬：新力飛堅旺財深智能業開心自在 白鹿勁添福駿驥勁力明海光輝

魑魅魍魉

　　今日又係大賽日，會唔會好似上期咁正路，場場大熱門都順利走晒入嚟，作為馬迷梗係想，事關爆到亂晒籠，點都對分析賽事時有影響。

重心場次：第9場　第三班（80-60分）1600米

　　「天外之天」終於跑番1600米，唔再一味齋跑1400米，好大可能對提升能力起到作用；賽前整套工序流程安排理想，狀態喼得好，有埋好位仲易跑，可望贏番場。

　　「精奇」四升三班，負磅輕唔擔心冇得鬥，只怕無啦啦用番前仗主動跑法就弊。「香檳歲月」剛仗跑啱晒，一樣畀前駒技術性擊敗，就算佢負磅更輕，仍不易反先，跑P則有機會。

　　「勝利駿駒」目前或以1400米最合適，惟可揀之馬不多，算係正路腳。「進取」漸漸感到評分壓力，用小將只可略紓緩。「快利多」剛敗因氣管有血，回到三班夠唔夠爭，睇埋今場。「紅跑車」成日近而冇P，難再追。

第1場　第四班（60-40分）1200米

　　「風動寶」轉場絕對係好事，無謂勉強性能，由於排外檔，希望會擺前走，必比中置或留後跑法嚟得實際。「紅珊瑚」近仗在配件、路程及跑法多作嘗試，如試得啱，今仗對手唔多，有權贏。

　　「多多昇」唔喺最銳之時，但落班後一再見近，要拖。「享耆成」如內檔令走規不再似上場外閃，唔排除有更接近演出。「中國好」經常喺前列過終點，勉強可兼顧。

第2場　第五班（40-20分）1200米

　　「金莊」剛仗跑尾二可能係腳痛影響，敗後復課則完全冇問題，大閘早段咬得前而拉士仍貫注，今場用得韋達，有晒誠意。「駿盈」位靚，對發揮幫到好多，本身喺五班微超，有威脅。

　　「千笑」1000磅唔夠，唔會襟搏，唞番1個月，或可維持到近仗水平。「真如寶」轉倉首戰比預期還要好，確認了分利嘅優勢。

第3場　二級賽（3歲及以上）1200米

　　「蓮華生輝」跑短途G2，部分對手根本唔同班，贏卡士。「時尚風采」總算做夠嘢兼喺大閘走得好，至於係咪睇得唔打得，跟埋今場。

　　「點心」遊完飛機河返嚟，恐有影響。「飛闖」與「富貴金龍」曾同場跑此程，後駒贏馬而前駒冇P，唔係實力嘅問題，主因在檔位因素，今場反先唔意外。「傾力之城」近仗締速愈來愈勁，近況太銳，而本身縮程亦無不可。

第4場　第三班（80-60分）1200米

　　「新力飛」之前喺此程屢有好成績，上場泥地輸在性能，宜畀機會。「堅旺財」如睇過上場谷草1200米走勢，轉沙田或更合性能。

　　「開心自在」三班好超，賽前雖工夫多，問題係耐冇跑，可交番幾多成。「深智能業」排1檔，對於未識控制走規嘅佢嚟講，絕對係好事。「萬事綵」經上賽後，認定四班才有運行。「聖樂邦」內檔起步，唯一可取條件。

第5場　第四班（60-40分）1800米

　　「無雙小子」四班向來吃得開，剛仗跑到冇P，形勢唔就引致，等番同程再出，配搭又唔變，應會跑得好好睇睇。「奪錶」近績靚，此際靠銳，冇得拗。

　　「奔騰飛駒」喺A+3欄，後追跑法冇上場喺C+3欄咁蝕底。「得運歡笑」前仗已略有追勢，隔番1場後，落班報此程而不跑1600米，有可能更切合馬性。「善風」近仗已不只1場失望。「大將福星」計分好賺，長期有危險性。

第6場　第四班（65-40分）1400米

　　「白鹿勁」遇到1場未必慢嘅場合，佢嗰段咁爆得嘅後勁大派用場。「添福駿驥」肯加程，超班馬仲犀利。

　　「明海光輝」及「勁力」，有近績而實力不會下風，惟各有少少缺點。「星運俊爵」跑低半班，並回到田草，如果唔係莫氣，有得爭。「聚好盈」只加1磅再跑，計數冇理由唔揀多次。

第7場　第一班（105-80分）1600米

　　「滿綵」上場蔡明紹跑到冇得再曳，都可以有第五名，睇落隻馬的確堅，上班跑，根本唔怕。

　　「人人興旺」路程性能異常準，留後或中置跑法亦得，不會畀形勢局限。「軍事行動」陣上重口毛病已改，希望騎師取位唔差得過上場，唔係冇得贏。

　　「讚惑」兩度脫口，上場之敗有晒藉口，不過，最近大閘嘅走勢唔算特別討好。「戶外名駒」跑好快地中程，在一班中下級水平賽事，一定有得揮。

第8場　一級賽（3歲及以上）2000米

　　「加州萬里」贏金盃姿態可用「恐怖」嚟形容，只要今場有得追，唔會有幾多對手夠佢爆。「魔法幻影」以12月同程入Q水準秤，在此屬第二勢力。

　　「雄心威龍」贏打吡G1，嚟到女皇盃，其實未必夠撼，由於績靚，拖一注。「卡達聖」和「爆冷」，另一對摩廐馬，前駒從賽事中愈跑愈勁，後駒則食老本。

第10場　第二班（100-80分）1200米

　　「手風順」及「旺當家」，贏開而姿勢各有各勁，前駒上場蝕盡都贏，後駒剛仗喺末段似陣風，隨時一Q返。

　　「高風格」勝在演出穩定性強。「明燈」位好，此程又會比谷草1200米理想。「富高勝」之前曾傷腳，難確定影響程度。「六六精英」今季已超額完成。「歡歡樂樂」唔係外檔可兼顧。