西布朗愛華頓做大騷

港陌

14/05/2011
文： 山度士

今晚英超四場賽事，只有西布朗主場對愛華頓屬例行公事，今場勝負雖然對爭標或護級形勢都冇影響，但球員冇心理包袱之下隨時踢得更放，有機會上演一場入球騷。（有線304及204台周六晚7時45分直播）




西布朗聯賽排名雖然低過愛華頓，但自從鶴臣接掌帥印之後，球隊表現明顯有進步，尤其主場除咗輸過畀車路士之外，面對阿仙奴、利物浦都保持不敗，表現有保證。不過愛華頓近期演出亦唔差，自從佢哋喺足總盃被淘汰，之後九場聯賽只曾不敵曼聯，其餘八仗五勝三和，如果唔係同市宿敵利物浦季尾大爆發，愛華頓甚至有機會攞到一張來季歐霸盃入場券。


奧丹維治連續五仗入波


兩軍近況都咁好，要揀邊隊贏有一定難度，始終季尾波好講鬥心，今場邊隊贏波固然可喜，但輸亦無妨，落到球場埋牙五五波，相信雙方球員都唔會去得太盡，以免無謂受傷，同時亦因為呢個原因，預料防守上亦會較平時輕鬆，間接令入波機會大增。




西布朗對上十一場聯賽場場有波入，球隊中前鋒奧丹維治連續五場建功，腳風奇順。愛華頓中場奧士文近期後上亦頻頻有士哥，預計會係一場入球多頗具可觀性嘅比賽。




前香港足球先生，畀料同佢做人一樣，百足咁多爪，對唔同聯賽都有興趣。教波同貼波，一樣做阿哥。